上周影響匯市的自然係大量的美國經濟數據，不過另一吸引筆者眼球的是歐洲議會選舉。雖然主流黨派仍然佔大多數，但右翼政黨亦都氣勢如虹。

英國的右翼政黨獨立黨（UKIP）一向主張英國退出歐盟。上期寫英鎊提過明年五月英國大選，卡梅倫呢兩年為咗爭選票而夾硬谷起經濟，所以就算擔心樓市泡沫都好，英國都未必敢加息，結果就派央行行長卡尼出口術為樓市降溫。

如果卡梅倫下年贏到，咁佢應承過選民一七年會公投脫離歐盟。如果佢輸咗，萬一獨立黨贏到，都一樣會有公投脫離歐盟。假如我係當地的企業老闆，如果脫離歐盟即係代表失去出口往歐盟國家的稅務優惠，咁真係要諗諗係咪要繼續擴充。

如果係咁，英鎊下半年有蘇格蘭公投同埋大選影響下，可能成為獲利平倉藉口，1.70呢個海嘯後高位阻力仍大，最近連1.6740都跌穿，下一支持在1.6660，到時先考慮會唔會重新吸納。