近排大市以奀成交緩步上升，尋日期指結算日見真章，期指大戶托住結算價，捱過上晝，下晝市況經已走晒樣。恒指由早市最多升129點，到午後倒跌112點，收市跌69點，收報23,010點，主板成交583億元，沽空佔大市成交比例升至11.46%，是五月以來第三高紀錄，反映在現貨市場做淡的基金經理十分活躍。

金軟的高昂估值，要靠小米偶然傳出的借殼消息支持。（資料圖片）

太陽日誌 2014/5/30

近大半個月，港股從21,680點彈上接近滬港通後高位23,224點，唔少二三線基金股浸浸落，反之估值低殘的大價股，好似滙控（00005）、內銀及本地地產股就成了資金避難所，帶住指數向上，基金risk off，主力換貨買入safety margin高的低估值股，後市會有幾好？實在唔使畫公仔畫出腸。筆者亦認為唔係十分樂觀，就算今浪升穿23,224點，爆單邊升市的威力相信亦都有限。

騰訊丁財兩不旺

騰訊（00700）拆細後，首日以原有股份編號及臨時編號（02988）並行買賣，原有「七窿窿」門牌，開始以每手100股形式交易，意味騰訊上車價由四萬幾落番去萬一蚊，可是首日兩個編號加埋2,455萬股成交，僅較前一日多2.9%，顯然未收到拆細的預期效果，既未旺丁，更不旺財，股價跌3%收109.8元。

小米影子股金山軟件（03888），首季營業額6.76億元（人民幣．下同），按季及按年升1%及47.8%，純利2.46億元，按季及按年則升48%及25.6%，但撇除出售合營公司收益，其實業績明升實跌，營運溢利跌29%。期內毛利率按季跌3個百分點，至84%，網絡遊戲每日平均最高同步用戶人數59.9萬，按年跌5%，每位付費帳戶每月平均收益48元，按季跌2%。

業績曝光後，金軟股價急挫11.5%，至22.95元，市值單日蒸發35億港元，但仍有272億港元，以大行預測8.5億至10億元的全年盈利計，一啲都唔算平，其高昂溢價，看來只能要靠小米偶然傳出的借殼消息支持，投機味濃，但就唔多啱在下胃口。

麵包師傅「薪」價漲

前日大埔白石角科學園比鄰的一幅住宅地，由稀客鷹君（00041）以每呎樓面地價3,300港元中標，成交價遠低過預期外，甚至比七年前同區首幅推出地皮低三成。筆者認為，咁嘅出價竟然無流標已經係一奇。據報該地皮接獲四份標書，其中一份係來自隔籬有大量待售新盤的信置（00083），居然無出嚟托價，又係一奇。

早排一個飯局上，有發展商高層呻話短期都唔會再投地起樓，理由唔係佢地睇淡樓價，主要擔心特區政府幾年內一大堆基建齊齊開工，港珠澳大橋、西九文化區、仲有唔知搞唔搞得成的第三條跑道，以及愈揭愈臭的高鐵及西鐵，為趕進度，最後都好難避免用銀彈搶人，未來兩三年建築成本只會有上無落，就算麵粉價落咗，因為麵包師傅薪水愈來愈高，麵包都好難賣得平。

由尋日白石角地皮成交價公布後，主要地產股統統逆市向好，可見市場有類近睇法，唔信一幅地成交價會隊冧樓市。至於buy定唔buy，大家悉隨尊便。