五月期指在23,000點樓上結算，叫人意外。不過，市況淡靜依舊，尋日大市成交583億元，最活躍的莫過於首日以一百股一手並行買賣的騰訊（00700/02988），成交額合共27.45億元，可惜股價一開市經已高見114元，全日高位114.5元，之後便反覆回落，並以全日低位109.8元收市。

億和近年成功開拓汽車零件業務，成為盈利增長亮點。（資料圖片）

換言之，尋日入場湊熱鬧的散戶，大部分都做咗艇中人！

去年六月「錢荒」一役仍歷歷在目，今年中央不敢怠慢，此前已密集推出各項微刺激措施，近日人行收水力度亦有所放緩，尋日僅進行100億元人仔的28日期正回購，以單日操作額計算，乃今年以來新低。可以預期，在中央積極維穩下，六月大部分時間市場將會在平淡中安度敏感時刻。

長實有勢挑戰150元

前日新界大埔白石角地皮以24億元批出，樓面呎價僅約3,300元，較估值下限低17%，創白石角賣地呎價新低。當然，麵粉價跌，麵包價不一定就會跟住跌，因為製作過程中還涉及其他因素。從另一角度睇，呢幅地之前曾流標，一來先前叫價過高，二來可能係本身地點有先天不足。

雖然地皮低價成交，但未有影響地產股表現，尋日恒生地產分類指數逆市升298點，收報29,081點。除咗新世發展（00017）低收0.1%之外，其他成分股均高收作結，表現最理想的是長實（00001），股價再創五十二周新高137.5元，收報137元，升2.1%。長實旗下新盤開售市場反應理想，睇勢呢轉真係有機會反覆挑戰140至150元水平。

汽車股整體氣氛仍偏強，近年成功開拓汽車零件業務的億和控股（00838）剛發盈喜，預計截至六月底止上半年淨利潤將較去年同期大幅增加，主要是營業額顯著上升以及採取成本控制措施收效，又披露今年首四個月淨利潤已超過去年全年淨利潤。以去年億和賺5,543萬元計，再假設首四個月的良好勢頭可於年內餘下時間持續，即係話現價預測市盈率可回落至15至16倍水平。

該股股價自三月由0.95元起步升至尋日高位1.56元，累升六成，已預先反映盈利復甦，但由於汽車零件業務前景看好，料中長線股價升浪仍可延續。