四月美國耐用品訂單升0.8%,比市場預期的0.5%好,除了是連續三個月上升外,三月數據亦都向上修訂,可見踏入第二季,美國經濟復甦力度依然穩健。前晚道指升69點,收報16,675點,距離歷史高位僅61點。

長汽新車款雖要延後推出,但論基本因素仍然優勝。(資料圖片)

太陽日誌

瑞聲未來兩季業績預測

港股終於打破悶局,成交去到個半月新高的718億元,收市指數也是個半月以來首次企在兩萬三樓上,升135點,報23,080點。大市成交激增,多得美資基金Waddell & Reed以每股55.45元,配售1.92億股金沙中國(01928),尋日朝早消息已經話街外反應好到暈,唔少向隅的本地芬佬響街掃貨,結果股價全日無見過批股價。W&R沽貨,原因係賣仔換阿媽,準備套現之後入番揸金沙中國七成股權的Las Vegas Sands。

基金沽金沙有啟示

以批股價計,金沙中國往績市盈率26倍,比LVS的24.9倍只係高4.4%,可能有人會質疑勞民傷財,一買一賣最後益咗經紀。但睇番去年金沙中國賺171.7億港元,LVS賺23.05億美元,意味澳門收益,大約佔LVS整體的三分之二左右,今年「五一」假期,市場消息話澳門賭業收入增幅有所回落,今次W&R的舉動,未必等於看淡金沙在澳門的生意,但可以肯定,他們比較看好拉斯維加斯及其他新市場,包括年內有可能發賭牌的日本發展潛力。

蘋果公司落實今年全球開發者大會(WWDC)於六月二日揭幕,在憧憬新產品推出下,尋日一堆「蘋果概念股」異動,富智康(02038)、信利(00732)及瑞聲(02018)都有進帳。作為果粉,史提芬年年都會捱夜睇視像直播,溫馨提示一心諗住等蘋果推大Mon iPhone的炒家,一○年教主Steve Jobs親身落場,在WWDC介紹iPhone 4之後,近幾年新iPhone都會喺WWDC後再搵時間舉行獨立發布會。

iPhone概念未炒完

網上見到,同高登仔搵料功力不相仲伯的一些果粉網站已率先爆料,預告今年WWDC主要發布新IOS及智能家居系統,欲一睹新iPhone及iWatch,大家或者仲要等等,而從好嘅方面睇,蘋果概念股仲未到好消息出貨之時。

國務院提出今年底前,全國要淘汰600萬部高污染排放的「黃標車」及老舊汽車,其中北京、天津、河北佔總數兩成,消息令近期炒落後汽車股鑊氣更盛,廣汽(02238)升4.1%、華晨(01114)同長城汽車(02333)升2.7%、東風(00489)升2.3%。四隻股票之中,因為旗下寶馬合營一六年產能倍升惹憧憬的華晨,股價貼近今年高位之外,其實另外三隻汽車股的預期市盈率都在單位數字。

論值博率,筆者心水係長汽,市場期待的煞食車款H8,月初話因技術問題需要延遲到今年尾明年初至可以推出,股價最低落過26.1元,昨收31.7元,尚未補番晒月初的下跌裂口。H8只係延遲推出而非擱置,論質素及一五年的增長條件,車股之中,長汽值得優先考慮。