近年唔少內地企業嚟香港，成為本港甲級寫字樓嘅租務生力軍。原來過去六個月面積8,000方呎以上嘅甲級寫字樓租務成交中，佔咗超過50%租客係內地企業。以佔用樓面計，就由二○○八年只係佔約12%，升到今年四月底嘅19%。過去六年累計吸納面積已經超過100萬方呎，相信受惠滬港通政策，估計未來五年，內企將會再吸納約80萬方呎樓面。

近年內地企業成為本港甲級寫字樓的租務生力軍。（資料圖片）

世邦魏理仕駱應銘（中）稱，本港甲級寫字樓的內地企業租客急升。左為陳錦平，右為沈燦城。

2014年中區甲級商廈租客來源地

世邦魏理仕辦公樓服務部執行董事駱應銘同劉Sir講，佢哋揀選咗25幢位於中環、金鐘、上環及灣仔區甲級寫字樓，包括國際金融中心2期、交易廣場及中環中心等進行研究。

佢哋發現○八年內地企業租用呢類商廈嘅公司數量，只係佔整體比例約13%，但今年已升到約21%。

由內企租用嘅中區甲級寫字樓佔用面積亦由12%，上升7個百分點去到19%，平均每年吸納樓面約有19萬方呎，即係過去六年就吸納咗逾100萬方呎樓面，預期未來五年每年可再吸納面積約16萬方呎，計落有約80萬方呎。

銀行金融租客佔56%

至於邊類中資最積極承租？駱氏話，以從事銀行及金融財務佔約56%最多；而房地產及物流行業就各佔9%。

事實上，過去幾年內企租客嘅取態都有唔少轉變，好似由初期會不惜高價搶租海景靚位，又或者講派頭豪租逾萬方呎單位，到依家取態轉為成熟及踏實，唔少寧願先喺香港租用細面積寫字樓，待業務趨成熟之後先擴充。

該公司香港、澳門及台灣研究部主管陳錦平又話，今年頭四個月本港整體寫字樓嘅淨吸納量約27.8萬方呎，相比舊年負吸納量34.5萬方呎已經有改善；四月份甲級商廈空置率約3.4%，相信滬港通將於第四季推出之後，估計明年租金有望出現數個百分點升幅。

港租金跌 深穗俱升

吸納量多咗某程度可能係本港商廈嘅租金回落，高緯環球嘅《亞洲寫字樓二○一四年第一季度研究報告》，喺亞洲33個城市中，香港首季租金按年跌1.43%，上季升幅排名22位。

此外，深圳及廣州租金分別升17.4%與14.32%，名列第3位與第6位。