魚缸仲未踏入世盃月，成交已經明顯縮晒水，但暴炒妹留意到隻巨濤海洋石油服務（03303），喺成交持續增加下，股價由一年低位1.34元爬番上嚟，尋日再升2.4%至1.67元，即市掂過1.7元，短短一個月內升幅26%，可以望吓。

睇番巨濤嘅成績表，去年營業額增長46.2%至8.9億元人仔，純利增長34.4%至5,564.5萬元人仔，主要歸功於油氣設施及油氣工藝處理設備製造業務激增七成，該分部毛利率亦由19.5%升至25.6%，但其餘兩個分部均出現倒退，難怪股價一度捱打。今年公司將會重點拓展水下服務，去年買咗幾個水下服務綜合項目同一間潛水工程公司，或令海洋油氣技術服務業務有所改善。

巨濤海洋石油（03303）

阻力位：1.85元

支持位：1.50元