正所謂「好景不常」，沙士後個人遊措施確實有助香港經濟復甦，但畢竟香港這彈丸之地，個人遊人數不斷上升，終會不勝負荷，檢討亦有其必要。尋日傳出政府研究削兩成個人遊配額，零售及收租股遭殃，九倉（00004）及希慎（00014）同跌逾3%，其他金飾及服裝股亦難免一跌，相信今浪調整時間會以季度計，即係話冇咁快跌完，故別心急入場撈貨！

東風透過入股法國標緻拓展海外市場，今年目標銷售量有約一成增長。（資料圖片）

回說尋日市況，繼續悶局一場，恒指全日波幅唔夠100點，大市成交僅429億元。有心理準備，淡靜市會在六月大部分時間延續。眨眼又大半年，年初預計今年本港IPO市場會幾熱鬧，點知萬洲叫價過高臨門失腳，而阿里又選擇登陸美股，失卻兩位大客，今年上半年本港IPO市場失色不少。

港交所有下調壓力

展望下半年，至少第三季未見有巨型IPO出現，加上滬港通末季開通，此前大戶們對於認購新H股頗為審慎（因滬港通後有直接渠道投資A股），可能變相令新H股上市個案減少，故阿莊對下半年IPO市場持觀望態度，相信現實與去年底大家的樂觀預期有一段距離，加埋次季魚缸交投咁靜，相信港交所（00388）要落番120至130元先至值博。

指數高企，市況淡靜，短炒集中在有國策支持的落後板塊勝算較高。近日見到汽車股有鑊氣，除咗比亞迪（01211）成功配股集資外，國務院話年底前要淘汰六百萬輛高污染及老舊汽車，亦刺激板塊氣氛，尋日東風（00489）、吉汽（00175）及華晨（01114）升幅介乎3至4%，不失為淡市之中的一個亮點！

東風去年同法國雷諾合作，又入股法國標緻雪鐵龍，料有助拓展海外市場，今年公司目標銷售量按年增長9至11%。股價方面，由四月中旬高位11.72元反覆回落至本月低位10元，主要是有基金減持所致。上周股價開始止跌回升，已重上10日及50日線，尋日大陽燭有成交配合，收報11.08元。

上月東風的SUV銷情料不俗，若四、五月的銷售數字對辦，可對股價起支持，短線若能企穩250日線11.1元樓上，有勢重上12元樓，回吐10元關未宜有失。