美股、美債及美元近日一反常態一同上升，標普五百指數歷史性在1,900點之上，但同時美國十年債息繼續在低位，亦有資金追捧美債，反映股市及債市投資者對經濟復甦甚至聯儲局在貨幣政策上的取向，似乎都出現分歧。

歐元兌美元走勢

本周一定要留意美國GDP修正值，由於美國貿易赤字意外擴大咗，令市場預期美國GDP可能連初值的0.1%都冇，要向下修正至-0.5%，出現3年來首次衰退，難怪資金繼續泊喺債市先。

雖然係咁，但匯市上美元又出奇地無反應，仲要穩步上升添！始終匯市係相對的，歐元佔美匯指數比重最大，而六月五日歐洲央行議息前歐元續跌機會高，美元自然水漲船高。

歐洲連續46個星期有資金淨流入，係炒歐洲復甦概念，無錯資金流入令國債息率都跌，即係歐豬國家利息成本下降，不過失業率維持喺高位、銀行借貸又唔見好多，反映企業對歐洲復甦信心未夠，央行有條件出手減息或負利率，去迫銀行借貸同埋鼓勵企業加大投資，帶動經濟。

如果呢個因素歐元都未跌，歐洲議會選舉就可以係導火線，今次選舉似乎都幾多反歐政客贏出，令歐洲施政多咗變數，投資者最唔鐘意變數。歐元上星期跌至1.3610都彈唔起，即係買盤唔多啦，本周繼續趁反彈沽貨，阻力由1.40已下移至另一區間1.3768-80，支持再移低少少至1.3500。