昨晚英美股市休市，本身已經靜局的港股，投資者尋日索性放軟手腳，大市創今年最低成交紀錄，僅得392億元，恒指收市微跌2點，報22,963點。

港府放寬辣招後新樓盤開售反應熱烈，利好地產股氣氛。（資料圖片）

太陽日誌 2014/5/27

綜合大行預測華創業績（港元）

尋日焦點一定要講比亞迪（01211），上周五午市拉閘配股，以14.95%大折讓的每股35元，配售1.219億股，集資額42.6億元，尋日復牌股價早市低見37.5元後，逐少收復失地，最後倒升0.15元，收41.3元，意味接貨者帳面即賺18%。話就話接貨基金要T+5至收到新股，尋日未沽得，但1,225萬股沽空等於批股規模一成，可見收貨前唔少芬佬已經透過沽空鎖定既得利潤，股價居然仲可以倒升，尋日衝入去的，實力不容忽視。

比亞迪表現硬淨

尋日跌唔落，短期睇落應該有計，尤其今次批股size相當於H股已發行股數15.3%，唔算多，加埋尋日三十二球成交，賓虛場面，估計過幾日新股出街壓力未必咁大。當然，以基本因素考慮，要清楚就算集資後明年電動車產能倍升，但未有耐有實質貢獻，押注比亞迪係憧憬一個長遠中國電動車夢，至少未來兩三年股價都要靠晒夢想溢價支持。

華創（00291）公布季績，營業額及盈利分別跌15.7%及30.5%，至418.1億及3.56億元，三大範疇中，零售業務溢利倒退10.3%至3.7億元；虧轉盈的啤酒業務，收入78.7億元，卻只有600萬元溢利；食品及飲品業務分別虧5,000萬及獲利1,000萬元。

華創季績遜預期

由數字可見，零售業收入對華創的重要性日益提高，去年十月與英國Tesco成立合資，整合中國零售業務，會係未來兩年業績得唔得的關鍵，但睇番首季盈利只及大行全年預測19.27億元的一成八左右，就算未來三季業績從後趕上，全年趕到大行目標19.2億業績，28.8倍PE雖然同五年歷史相若，但便宜零售股通街都係，又何必揀佢？

近期荃灣新盤開售反應熱烈，主要係用家經已觀望咗近半年，樓價都唔係點跌，息口又持續低企，加埋政府送上東風，DSD放寬買樓花限制，用家終於忍唔住手入市。有新盤銷情佳，相信唔少地主都會把握時機推售新盤，成個樓市生猛番啲。

地產股中，長實（00001）二月以來股價呈一浪高於一浪，短線回吐守穩130元關，後市仍有機會再反覆迭創五十二周新高。至於新地（00016），本月股價成功重上100元關及250日線，走勢亦有改善，但如果睇好正股表現，可以考慮其公司認股證（01441），昨收8.29元，溢價4.58%，實際槓桿6倍。