近排寫字樓買賣雖然幾靜，不過中區甲級寫字樓做價始終有保證，所以業主放售價都幾進取。劉Sir收到風，合和（00054）主席胡應湘嘅太太（胡太）持有嘅中環皇后大道中九號33樓全層樓面，將會拆開3個單位放售，呎價由3.28萬元起步，均價就要3.5萬元，勢創本港商廈呎價新高；全層意向價就約4.8億元。

合和主席胡應湘夫人放售旗下皇后大道中九號寫字樓物業。（資料圖片）

胡應湘夫人

皇后大道中九號放售單位資料

第一太平戴維斯溫武忠話，胡太放售嘅皇后大道中九號33樓，全層建築面積大約13,769方呎，會拆開3個單位放售或放租，建築面積由4,178方呎起。

佢話物業會交吉放售，而今次放售呎價由3.28萬元起步，已經係本港甲級寫字樓呎價新高，全層意向價就約4.8億元。

計番呢批單位平均呎價可以去到每方呎3.5萬元，勢再創新高。其實現時紀錄都係由皇后大道中九號保持，一個中層3B室，近排成交呎價達約3.1萬元。

般咸道舖6500萬放售

溫武忠仲話，胡太仲會以呎租78元起放租，無論租售叫價都幾吸引，喺核心區寫字樓供應緊絀情況下，相信都可以受到投資者或者用家垂青。劉Sir知道，胡太二○一○年以約3.4億元買入上述皇后大道中九號33樓。

投資者林清林都把握機會放售舖位，香港置業老友爆料，佢喺一二年以約3,900萬元買入嘅上環般咸道33號地下，依家就以6,500萬元放售。唔講唔知，原來前租客係老牌餐廳莎厘娜，不過已經轉咗租客，依家由連鎖咖啡店承租，月租約12.8萬元，租金回報約2.4厘。

寫字樓空置首季回落

至於中環結志街福志樓地下4號舖，林清林就以約2,800萬元放售，依家月租約4.8萬元，都有超過2厘回報。

另戴德梁行剛啱發表最新報告，話首季亞太區寫字樓租金有輕微增長，期內亞太區淨吸納量就減少咗28%至130萬方米，其中香港近排寫字樓業主提供唔少租務優惠，季內淨吸納量就增至3.4萬方米，空置率回落至5.6%。