自從上年七月英倫銀行行長卡尼上任後，英鎊由1.48升至今年最高近1.70水平，除了經濟好，當時很大程度是憧憬卡尼會進一步推量寬，點知唔加推不特止，仲傳出英倫銀行提早加息。

不過，英國呢兩年推出咁多措施刺激經濟，直接令英國股市衝上十四年高位，背後目的明顯是製造財富效應，為了明年五月大選的選票。經濟好，選民自然傾向投番畀現屆政府，卡梅倫贏面相信都幾大。

到了這關鍵時候，英倫銀行會唔會咁快就加息打擊股市同樓市，到時經濟跌番下來，選票就有不明朗因素，如果係我就唔會博，除非去到非加不可的情況。

短線除非美匯指數明顯跌穿79，否則因加息預期令英鎊再向上突破機會未算好高，再睇歐元走勢開始逆轉、澳元等0.94阻力亦大，英國經濟到年尾前可享低息蜜月期，相信匯價要先行調整，建議1.69可試沽英鎊，止蝕於1.70，目標睇穿1.6740，支持位在1.6680。