今年以來，滬綜指在無形之手支持下，力守兩千點重要心理關口，但問題係，首季經濟增長進一步放緩已成事實，股市表現在人為因素下未能反映實況，若然未來半年內地經濟進一步轉差，A股破底只係遲早問題，屆時沽壓一次過爆發，可能跌得仲甘！阿莊唔敢低估阿爺處理危機的能力，但亦深信，內地市場堅持走改革開放之路，就要明白只有讓市場自行調節，投資者才有信心押注在新的上升周期。

青啤母公司在未來十二個月會持續增持A股，消息對股價起支持。（資料圖片）

比亞迪中長線吸引

今年首四個月，內地新能源汽車銷量已超過一萬台，較去年全年的1.7萬台有明顯改善，可見政策支持開始見到效果。期內比亞迪（01211）的「秦」，累計銷量已達3,294台，單係四月份就有910台。據講現時「秦」的手頭訂單已增至接近8,000台，待電池擴產項目在年內完成後，估計「秦」的月產能可由800台提升至2,000台。

今年首季，比亞迪股價由35至36元水平起步，升到上五十二周高位見56.95元後回落，近月正考驗250日線（37.7元）承接。如無意外，今年比亞迪有望鞏固其於新能源車市場的領導地位，中長線投資價值不減。

世界盃六月十二日開鑼，以往魚缸有「世界盃魔咒」之說，即大戶們都沽貨離場去睇波，令市況淡靜，指數走低。不過，依家收費電視普及，要睇波，基本上晚晚唔瞓就有得睇，所以球賽對魚缸影響雖有，但應比以往減少。

短炒世盃概念，離不開啤酒、運動相關產品之類。尋日見專門替大品牌生產運動服等產品的申洲（02313），股價上過29元，收報28.25元，升1.9%。啤酒股方面，選擇不多，華創（00291）在母公司前高層涉貪事件陰影下暫難有大作為，揀來揀去等番隻龍頭股青島啤酒（00168），尋日股價曾見61.2元，收報60.25元，升1.8%。

近日青啤披露母公司增持公司A股，並指會在未來十二個月繼續在二級市場增持，累計增持比例將不超過已發行股份的2%，消息對股價起支持。現時青啤預測市盈率28倍，以其市佔率而言，估值唔算昂貴。近月技術走勢有改善，一旦突破62元阻力，中線有望再試年初高位66至67元，回吐56至57元乃主要支持。