近排內地旅客訪港勢頭已經無之前咁強勁，零售商舖生意少咗，租金增長都差啲啦。劉Sir知道，金朝陽（00878）今年約30%續租商舖，租金增長放緩至低雙位數，比起舊年個別約三成升幅無疑係收窄咗。不過，喺銅鑼灣金朝陽中心2期Midtown近排陸續入伙帶動下，佢哋有信心下半年租金會有較好增長。

陳慧苓（右）表示，金朝陽今年會推出葵涌青山公路工廈等項目。左為集團主席傅金珠。

本港零售生意較去年回落，金朝陽旗下商舖租金出現放緩現象。（資料圖片）

珠寶鐘錶等按月銷售銷及變幅

金朝陽陳慧苓同劉Sir講，近排零售氣氛較遜色，不過，旗下舖位租戶營業額雖然唔夠舊年咁好，但仲有增長，其中美容、髮型屋等本土消費為主嘅行業，受到嘅影響就更輕微，所以租金無乜下調壓力。

佢話今年約30%續租舖位租金有低雙位數增長，比舊年放緩咗。但最近Midtown陸續入伙，可以帶來強勁嘅租金收入同埋現金流，預期下半年租金會有增長。

陳慧苓仲話，今年主要推售兩個項目，包括葵涌青山公路工廈同埋西半山摩羅廟街住宅發展，礙於兩項目都喺批則階段，暫時未有具體詳情。至於旗下大坑COHO住宅項目就會採惜售態度，唔會大幅調整價格。

續覓港島收購項目

對於最近沽出嘅灣仔聯發街項目，她話做價好吸引，所以套現換貨，會繼續物色港島收購項目，同時會留意政府地皮。金朝陽鄧文祖補充，撇除主要收租項目，集團手持物業以舊樓為主，市值約40億元。

西港島綫嚟緊通車，唔少舖位業主都主動出擊放賣放租。香港置業簡元鎧話，西營盤第三街100至106號高層地下舖位，面積大約1.02萬方呎，依家以意向價約1.3億元放售。上述物業現為幼稚園，但就以交吉形式出售。美聯旺舖侯柏宇都話，西環厚和街44至52號6及7號舖，以每月租金5.5萬元放租。

甲廈今年料漲價12%

至於甲級商廈嚟緊走勢都唔輸蝕，美聯工商舖黃漢成話，港股同內地股市互聯互通早排落實，中資金融機構預期會擴充業務迎滬港通，增加本港甲廈需求。今年甲廈樓價有望升約8至12%，租金更有機會升約10至15%。另今年頭四個月工商舖買賣成交逾1,600宗，對比起舊年「加辣」前銳減。