前晚華爾街兩大指數創歷史新高，支持港股連升第五日，昨日早市恒指仲係牛牛皮皮，直到十一點半，中央放水的流言滿天飛，好友一個唔該，殺多輪淡倉，現貨及期指挾到午後高位22,664及22,550點至肯停。

恆指期貨走勢

下午一點半後，大市主要消化上周的挾倉升幅，窄幅上落，恒指最後收22,582點，再升230點，期指客尾市明顯見好就收，五月期指日市收22,386點，減去大約150點除息因素，實質仍要低水46點收場。

昨日，無論恒指現貨及期指都升破上月廿九、三十日高位，市底有迹象已扭轉滬港通後一浪低於一浪形態，筆者並無破位追買，一來周初已成功低位撈貨飽食遠颺，不急於一時追勢。

其次，昨日收市價計，現貨及期指都有多少瑕疵，例如現貨未能企穩23,224至21,680點跌幅的0.618阻力22,634點收市，未算強到非追不可。

另一考慮，是大市已連升五日，近排資金炒落後的其中一隻升市火車頭中移（00941），大孖沙對內地爆出4G劈價消息未有反應，最怕啱啱轉強的電訊股氣氛逆轉，或令短期市況再缺乏焦點，一於睇埋今日至算。