經前日急升四百點後，港股尋日有抖氣迹象，升市火車頭轉由中港兩地地產股帶動，恒指升90點，收報22,352點，主板成交金額縮番到507億元。

去年減價戰令統一即食麵業務虧損，但今年壓力可望紓緩。（資料圖片）

太陽日誌

大行預測統一業績（人民幣）

市場吹到行DSD半年退稅期限會稍為放寬，修正後對樓換樓有利。由於SSD、BSD及DSD三管齊下，近年香港物業成交量持續萎縮，由高峰期每月過萬宗跌到四、五千宗。最近差餉物業估價署公布數字，今年私人住宅落成量達1.76萬伙的十年新高，今次措施修正幫到換樓客外，相信亦可避免一手樓庫存過分積壓。

樓價再癲唔容易

雖然今次政府表面讓步，畀人感覺係「至辣都係咁」之訊號，但SSD及BSD仲係好似炒家緊箍咒一樣，樓市投機成本太高，加埋一手供應咁盛，樓價要再癲似乎唔易，除非發展商劈價去貨比預期進取，否則中短線樓價平穩發展機會仲係較大。

內地方面，市傳人行要求銀行保證正常房地產融資需求，希望能夠對個人住房按揭貸款合理定價，刺激內房股尋日急升，其中世房（00813）升7.1%，碧桂園（02007）升6.5%，潤地（01109）升5.2%。

不過中央救市消息堅定流，一般散戶好難在短時間內核證，依家唔少內地二三四線城市因樓市唔掂，地方政府財政壓力已愈來愈大，陽奉陰違的地方救市傳言，下半年可能會更常聽到。

首季業績續疲弱

內地經濟放緩，衣食住行無一不受影響，連飲品及即食麵生產商統一（00220），首季未經審計業績亦表現麻麻，稅後利潤2.365億元（人民幣．下同），倒退兩成五。

去年康師傅（00322）帶頭打減價戰，統一即食麵業務在去年下半年呈虧損；飲品業務分部收入下滑近四成五，拖累下半年稅前溢利跌16%，去到3.87億元，而由今年首季業績所見，疲弱的情況似乎仍在延續。

季績公布同時，統一宣布五供一，供股價4.56港元，比供股消息曝光前折讓29.6%，集資32億港元。去年年報所見，公司淨負債比率由三成五升至五成六，今年資本開支估計為45億元，集資唔算太意外。股價今年累跌24%，持股七成的大股東選擇同小股民一齊供股，總要比殘價批股公平。

大行估今年業績跌兩成九，每股賺0.19元，供股價相當於一四年19.2倍PE，對比康師傅與旺旺（00151）一四年PE分別達28及25倍，23至31%的折讓尚算供得過，展望今年棕櫚油及PET等原材料價回落，對紓緩毛利壓力應該有點幫助，小股東應該考慮參與供股。