今年世界盃嘅比賽時間大部分喺本港時間凌晨三、四點進行，新地（00016）嘅觀塘apm商場，今年就用咗800萬搞宣傳，相信世盃期間生意額可以去到2.8至3.2億。至於信置（00083）嘅屯門市廣場，亦投放600萬做世界盃宣傳，預計六、七月商場營業額可望有超過15億元。

信置陳欽玲（中）表示，屯門市廣場斥資六百萬元做世界盃宣傳推廣。

四年一度嘅世界盃係商場兵家必爭嘅商機，所以個個都揼本，以創新高宣傳費迎接世盃。

新地代理租務總經理馮秀炎同劉Sir講，佢哋apm商場今屆世界盃嘅推廣費高達800萬，創商場歷屆宣傳費新高，除咗有全港室內最大610吋高清大電視供球迷睇波，亦提供數碼互動遊戲同埋送出超過200萬消費獎賞，仲有提供早餐或睇波必備嘅炸雞、米酒同辛辣麵。

apm預期銷售增兩成

劉Sir覺得，對上班一族嚟講，睇完波重可以食番個早餐返工，就一定唔會影響工作。

佢預期，為期約一個月賽期，apm商場生意額可達到2.8至3.2億，比上屆多一、兩成。至於同系新地9大商場，包括wtc more世貿中心等，則動用超過1,400萬喺商場做世盃宣傳。

至於信置租務部總經理陳欽玲就話，雖然屯門市廣場未必會要求商戶延長營業時間配合世盃賽事。

屯廣冀人流創新高

不過，佢哋都用600萬嚟做宣傳，除咗有鮑魚燕窩早餐同送返工外，仲搵咗巴西球迷借出超過100件總值50萬元嘅限量版巴西足球收藏品做展覽，預計六、七月份商場營業額，可望有超過15億元，比舊年升一成。

當中電器商戶營業額估計至少都有一成半增長，而體育用品生意就可望有兩成半升幅，帶動同期商場人流有雙位數字嘅一成增長，創歷年新高。

佢哋商場今年首季營業額有23億，比舊年同期升八個巴仙。同系奧海城商場都用600萬做世界盃宣傳推廣，希望將六、七月生意額搶高到3.8億嘅創新高水平。