今年好多投資專家包括筆者，都睇好美元走勢，因為美國經濟復甦步伐唔錯，加上慢慢退市又久唔久炒吓加息概念。不過，美元一路都強唔起，雖然未至於好弱，但只係繼續上落市，相信令好多投資者失望。

歐元兌美元走勢

美元升唔起，主要係聯儲局退市唔再係令美元上升的因素，反而係加息因素，但聯儲局主席耶倫又出口術盡量控制市場炒加息的期望，結果美國債息一直升唔起，最近仲落番去2.5厘附近，令美元資產吸引力下降，美元自然捱打。

憧憬歐央行出招

但另一方面，歐洲央行上周四議息，焦點就在行長德拉吉的言論，明顯表示擔心歐元過強，而歐元區仲有通縮風險，雖然呢啲大家都聽慣，不過提到六月會議有機會做嘢，呢一句令大家又有少少憧憬，如果歐洲真係進一步QE，咁本身對美元唔係支持因素的退市，又重新成為一個有利因素，因為此消彼長，大家有common factor去比較，對歐元嘅沽壓就會好大，1.40仲係技術上一條長期下降趨勢線，呢啲水平去沽歐元真係可以話係今年最好時機！

歐央行會議後，歐元曾經抽升至1.3995兩年半高位，筆者今年年初對歐元預測一直都係1.28至1.40之間，如果無睇錯咁呢個水平，沽歐元似乎贏面唔細，目標可向下移至1.3620左右。