藉「新國九條」及騰訊（00700）拆細前夕的強勢，昨日恒指進帳398點，收報22,261點。從技術走勢看，後市較大阻力，應該係上月期指結算失驚無神狂挾321點當日，指數的即市高位22,474點，升穿可以扭轉23,224點之後一浪低於一浪的格局。

個人遊消費見頂，對主攻屋苑商場的領匯及置富影響有限。（資料圖片）

太陽日誌

綜合大行預測置富業績（港元）

個市陰陰乾之後突然挾到癲，挾淡倉是其一，而本文唔止一次講過，近日港匯強到出奇，尋日即市見7.7514，平年初以來高位，同金管局強方兌換保證只差14點子，市場熱錢不缺，基金經理只係等一個入市理由，莫非連強勢的濠賭股都出現終極一跌後，個市真係見底？

騰訊揸京東勁贏

昨日騰訊貢獻86點升幅，一來公司四月先響五舊水附近回購股份，開始惹來繼續回購的憧憬，但主因仲係京東尋日開始推介活動。京東上市估值，最高可以去到248億美元，大約1,934億港元（四分一間騰訊size）。

話說今年三月，騰訊用2.15億美元入股京東15%，意味當日京東整體估值不過14.3億美元，短短未夠三個月，因為追捧科網概念的股民夠熱情，價值膨脹十幾倍，騰訊手上的京東，帳面已有過百億人仔的紙上富貴。

當然，炒家用呢個理由衝入去做清兵，筆者唔會反對，不過要清楚騰訊唔會短炒京東，且已經承諾上市時，會以招股價（即每股16至18美元）額外再買多5%股份，成本估計12.4億美元。

地產股憧憬減辣

近期市傳政府計劃放寬「雙倍印花稅」換樓期限，傳聞會由六個月改為一年。個人觀感辣招後樓市死寂，街外鎖匙盤又少，始終BSD同SSD才是窒礙換樓及投資客的殺着，地產商會唔會因此改善去貨情況？筆者唔樂觀，但○九年開始地產股已跟唔上樓價，落後得太緊要，任何風吹草動都有炒作可能，即使新例未必真係幫到佢哋，建議繼續睇實隻大落後的新世界（00017）吧。

近排美息落番唔少，一班好息的老友成日問有咩可以買。查實亞洲高息債券市場，過半來自祖國企業，當中有六成是內房股，大行估今年五至九月係內地私企債兌付高峰期，呢類為粒糖隨時輸間廠的高危活動，仲係可免則免。至於REITs，老實講，如果個人遊消費見頂，甲級寫字樓以外，有做遊客生意的商場店舖未來租值壓力都幾大，數落去都係搵專攻屋邨及私人屋苑的比較穩陣，貪影響最細，一對鐵膽必然係領匯（00823）及置富產業（00778），一四年估分別有4.19厘及6.28厘回報，仲有隻冷門小小，並非純正的REITs，但經營模式有啲似，是主攻將廠廈變成數據中心散租出去的新意網（08008），估計有4.5厘，且未來幾年租金及可供出租空間都有唔錯升幅，可以一併加入考慮。