一手住宅物業銷售條例下，新盤單位只用實用面積，計法亦同以前唔同，唔少設施好似冷氣機房等都唔會計落面積度，單位細咗，但實用咗。不過，差餉物業估價署仍然係用番項目舊有嘅實用面積準則計算差餉，相比之下差餉咪畀多咗。劉Sir老友第一太平戴維斯陳超國（Charles）就話，部分洋房項目，兩者計出嚟面積可以相差三成咁大。

第一太平戴維斯陳超國表示，希望銷監局和差餉物業估價署作溝通，統一實用面積計法。

一手新例不計入實用面積設施

個別洋房相差三成

新例已經實施咗成年，Charles話，喺呢一年佢幫發展商編制同審核咗超過50個新樓盤嘅樓書同相關資料。綜合有關工作，佢發覺部分入伙新盤實用面積計法，同差餉物業估價署有唔同，令兩者實用面積有顯著偏差。

佢話最離譜嗰個盤，係一個洋房項目，兩者計出嚟面積可以差距三成，即係話發展商賣畀你就計少啲，但到交差餉時，因為面積大番，差餉冇畀少，重要多咗。

Charles舉咗一個例，喺一手住宅物業銷售條例嘅定義，有十項設施實用面積係唔計落實用面積，例如空調機房，但差餉物業估價署就計埋，由於雙方嘅計算準則唔同，所以令到實用面積出現唔同。

冀統一計法消疑慮

不過，如果唔叫空調機房，發展商將佢叫做濾水機房，一手新例又可以接受佢計算入實用面積裏面，咁樣會搞到個市場好混亂。

所以Charles希望一手住宅物業銷售監管局（下稱銷監局）同差餉物業估價署溝通一下，修改少少嘢將兩個計法統一咗，消除市場嘅疑慮。

除咗呢個問題，Charles都留意到，好多時銷監局同業界喺樓書方面，最常要修正係圖則尺寸和位置圖附近需要披露嘅資料，呢兩部分指引清晰度唔夠，所以令發展商較多時要「執漏」。

銷監局回應話，局方計算實用面積大致同差餉物業估價署定義相同，僅未有把機房及私人電梯大堂計入。

另一方面，Charles仲透露，佢哋成立五年嘅廣州第一太平戴維斯房地產與土地評估有限公司，獲得中華人民共和國住房和城鄉建設部頒發房地產評估一級資質，同埋國土資源部頒發全國範圍土地評估資質。