歐洲央行議息息口無變動，但行長德拉吉擔心歐元過強，出口術暗示或會在下月推量寬，而減息方面亦持開放態度，大家估央行條底線係1.40，於是都唔敢推上去，去到1.3998就回頭。

消息對歐元不利，睇番1.3750第一個目標已到，短線歐元繼續調整機會高。雖然係咁，但同時美元又未有條件大升，聯儲局主席耶倫對就業市場唔算太悲觀，不過距離全民就業仲有一段距離，但邊有主席大大聲講自己經濟好得？

另一亮點就係提到樓市。聯儲局希望壓住債市，唔好畀按息抽升，因為一旦按息升，樓市腳軟就連帶財富效應都無埋，消費開支可能減少並進入惡性循環，美元暫難大升，但中線值得睇好。

美匯指數橫行咗半年，時間上隨時準備好突破，暫時向下突破機會高，不過美國復甦動力強過其他國家，唔敢對美元睇太淡，建議留意美匯79至81.70區間，突破區間先暗示有單邊行情，否則繼續上落市橫行機會高。