美國上月非農業新增職位數據，一睇個數字當堂就嚇一跳，然後就得啖笑。就咁睇新增職位28.8萬份真係好唔錯，好耐都無見過有接近30萬份增長，連帶二月、三月份新增職位都向上修正，而失業率亦跌至五年半低位。

歐元兌美元走勢

不過細項睇，失業率下跌係因為勞動參與率得62.8%，係一九七八年以來最低，結果又有80萬人退出勞動市場，令市場又唔敢一面倒睇好美國經濟復甦，結果大家又需要等了又等，美匯指數於79至81.70橫行咗半年嘅區間，都仲係等緊突破。

澳元目標0.9450

今個星期澳洲央行、英倫銀行同歐洲央行都先後議息，預期最無睇頭嘅係英倫銀行，反而澳洲同歐洲央行就可以留意一下。

澳洲央行昨日維持利率在2.5厘不變，減息周期基本上已經結束，而當地通脹已回升至2.9%，市場往後有機會開始轉炒年尾加息機會，對澳元來講應該係好消息，支持位分別係0.9240同0.9160，跌穿0.9160就唔可以睇得太好，所以止蝕位放係呢個位下方，目標先睇番0.9450。

另外，歐洲央行自然要睇德拉吉嘅言論，一路歐洲央行警告歐元再升，就可能令通脹回落繼而再推量寬，但一直只聞樓梯響，歐元又一直高企，相信歐元要大升都仲有難度，1.40關口比較難破，建議1.39樓上可試沽，止蝕1.40，目標先睇番1.3750。