自從實施加辣招之後，舊樓併購活動明顯減少咗，由二○一二年高峰期全年多達60宗強制拍賣申請，勁減到去年只有17宗。今年頭四個月入紙申請強拍個案，更加只得4宗，計埋涉及嘅地盤面積僅約4.3萬方呎，比去年同期分別勁減逾33%及約49%。市場人士預期，未來強拍申請數字將會愈嚟愈少。

辣招令舊樓併購難度增加，市場預期強拍申請個案將愈來愈少。（資料圖片）

今年強拍申請個案中，以恒地入稟申請強拍的紅磡馬頭圍大廈規模最大。（資料圖片）

今年強拍申請個案一覽

劉Sir計一計數，今年頭四個月土地審裁處只係接獲4宗舊樓強拍申請個案，合計地盤面積約4.3萬方呎；而去年同期就有7宗申請，就算撇除九龍觀塘道啟德大廈嘅重入申請個案，實際都有6宗新申請個案，合計地盤面積約8.5萬方呎。

馬頭圍大廈值近十億

今年截至四月錄得嘅強拍宗數同埋涉及地盤面積，比起去年同期勁減超過33%及約49%。

睇番今年4宗申請，以恒地（00012）入稟申請強拍嘅紅磡庇利街馬頭圍大廈規模最大，涉及地盤面積逾2.3萬方呎。

據一月呈交法庭嘅文件顯示，上述物業市值超過9.5億元；而去年就以啟德大廈規模最大，地盤面積約6.15萬方呎。

根據香港司法機構年報嘅資料，土地審裁處喺去年處理涉及強制售賣土地申請共有17宗，比起一二年嘅60宗勁減近72%，反映辣招推出後，舊樓併購活動明顯減慢。

DSD影響 併購難度增

萊坊董事及綜合估價部主管溫偉明話，政府推出多項辣招，當中以雙倍印花稅（DSD）對舊樓併購嘅影響最大。

去年強拍申請個案仍然有10多宗，大多數係過往收購至尾聲嘅項目。但隨着舊樓收購難度增加，估計未來強拍申請個案將愈來愈少。

另一方面，去年涉及強制售賣土地嘅結案宗數就有45宗，比起一二年多咗超過三成。其中一三年獲法庭准許以公開拍賣統一業權，並且批出強拍底價嘅個案約有27宗，合計拍賣底價總值約41.1億元。