新西蘭央行再次加息25點子至3厘，今年初以來筆者一直都話睇好紐元同英鎊，雖然新西蘭首季通脹數據比上季稍為回軟，反映通脹溫和，令市場有少少質疑今年持續加息嘅預期。不過睇番利率期貨，應該未足以令央行緊急煞車，而央行亦表示加息周期將持續，直到當地需求不再上升為止，令紐元中線可繼續睇好。

不過，近日國際奶價回落，對新西蘭出口有影響，紐元有回調壓力亦都正常。市場早已將央行一四年每季加息一次，總共加息1厘反映喺匯價之中，如果未來央行無以前咁牛，未來加息步伐有變的話，可能會令紐元進一步調整至0.8430左右。

不過，新西蘭經濟根基夠穩，相信央行亦都唔會咁快就「打倒昨日的我」，所以最壞情況只係「息繼續加，但無加得咁快」，所以方向上仍值得睇好，預期0.8350至0.8380區間有不俗支持，可吸引買盤開始吸納，建議0.8430買入紐元，止蝕於0.8350，目標先睇0.8600。