同幾個有番咁上下股齡的老友傾開，大家都覺得經濟融合之後，港股近年愈來愈A股化，在大批中資股加入之後，港股愈來愈似A股跟中央政策走，提高投資者風險溢價之外，本地投資者所獲得的資訊不對等的情況，經常形同靠二手消息搵食，難免變得慢半拍。

恆指期貨走勢

好似三月中，港股在外圍無太多利好消息下，靜靜由低位反彈近2,000點，到中央領導人提出滬港通計劃，炒得一日多時間，升浪隨即玩完，春江鴨已掉頭做淡。

捉唔到大趨勢，近日靠節奏搵食的一樣艱難，尤其個市成交縮到四、五百億元，大孖沙一注資金，日日玩唔同板塊，想跟勢炒，即使跟到手影，但在極短癮的炒作中，要搵到合理回報，都相當之唔容易。

四月期指下周二結算，以昨日所見，五月期指成交唔夠兩萬張，扣除股息後合理值22,320點，其實五月期指日市收住貼水，啟示性唔大，連大孖沙都靠邊站，何況跟勢炒的即市散客？

如果昨日恒指跌穿20日線22,548點收，短期弱勢可以進一步確認，偏偏最後以倒轉錘頭陽燭收於20日線樓上，死唔晒，但成交唔似樣。今日到臨近周末假期，開大開細都得，市況殊不明朗，睇多日至算都無壞。