市況觀望，但內地有報道指政府擬成立千億元基金支持集成電路產業發展，炒家喜見炒作機會，掃起相關股仔，好耐冇動靜的中芯（00981）升9%，晶門科技（02878）更急升16%，中國安芯（01149）亦升10%，反而價位較大的ASM太平洋（00522）僅升1%，反映板塊起動炒味甚濃，跟炒宜注意風險。

國美成功整合電貿及實體零售業務，為估值增添溢價。（資料圖片）

好耐冇見過藍籌股發行公司認股證，尋日新地（00016）發行的公司認股證（01441）首日登場，吸引唔少缸邊友目光，早段搶到上8元，但高位成交唔算多，結果收報5.75元，溢價7%，實際槓桿7倍。由於呢隻公司輪有兩年命，照計唔使咁心急上車，耐心等候本地地產股現較大波動，才留意低吸機會。

中移毋須睇太淡

中移（00941）連跌第八個交易日，但跌幅已收窄，尋日收報69.75元，跌0.3%。反而，聯通（00762）及中電信（00728）均做好，分別升3.8%及4%。三隻中資電訊股之中，論質素，阿莊還是首選聯通。至於中移，前日阿莊都講過，若然短線上唔番50日線，走勢將確認轉弱，有機會下試上月低位。

但補充一句，其實中長線唔使睇得過份淡，皆因爛船都有三斤釘，加上中移尚未登陸A股，同胞經滬港通買股，照計呢位「大哥大」有叫座力，而現價某程度亦已反映風險因素，呢轉真係再試上月低位，反可留意執平貨機會。

國美電器（00493）發盈喜，料首季盈利同比將大增2.4倍以上，主要在低成本高效率供應鏈的支持下，運營能力持續上升，期內銷售收入及同店銷售均錄得增長，綜合毛利率將超過18%（去年度為18.36%）。公司表示，今年首季收入持續上升，毛利率趨穩，表現符合市場預期，而連續五季的業績表現，確認公司已成功整合電貿及現有業務，業績重拾增長軌道。

事實上，國美有龐大的零售網絡，亦已成功整合電貿平台，未來可拓展的領域，絕不限於家電，這方面可為公司估值增添溢價。再睇其股價走勢，尋日高位1.52元，已平了去年十一月的高位，再上便創五十二周新高。回顧今年三月回落至1.1元水平，剛好係去年中低位0.62元反彈至去年十一月高位1.52元的升幅0.618，加上公司回購，為股價帶來支持。短線若確認破頂，升勢未完，年內目標反覆向1.8至2元水平推進，相等於一四年度預測市盈率20至22倍。