魚缸Blogger：亞太衛星趁低吸納

年多前推介過嘅亞太衛星（01045），依家股價已翻咗N番，有見近月由12蚊碌落8蚊，直到尋日以大陽燭升穿10日同20日線，反彈一成至9.08元，14日RSI處於合理水平，睇勢調整暫告一段落，低吸機會咪執輸。

亞衛過去三年營業額同盈利均持續增長，去年多賺54%至5.4億元，營業額升逾26%至11.3億元，原因係前年六月亞太7號衛星啟用，同埋投資新華電視可換股債券的未變現重估增值。

去年公司已經開展亞太9號衛星項目，預期將於明年末季發射及在軌交付，以擴大客戶基礎，以及亞太區衛星轉發器服務、廣播服務及電訊服務的能力，有機會繼亞太7號衛星後，成為新增長亮點。