市場已逐步消化雙倍印花稅等負面因素，今年首季多個資深投資者開始入番市。包括近幾年甚少入市買舖嘅「舖王」鄧成波（波叔），同埋投資者鍾楚義等多名投資者，期內先後掃咗8項零售及舊樓物業，涉資約18億元，價量都係比舊年首季多。波叔話，由於商用物業受辣招影響比住宅細，投資價值可睇高一線。

投資者鄧成波和鍾楚義（圖）於銅鑼灣一帶購入零售及舊樓物業。（資料圖片）

鄧成波

投資者首季入市或沽貨獲利個案

喺舊年首季，市場已預期政府「出招」打擊工商舖炒風，唔少投資者少咗入市，反而積極沽貨套現，當中包括波叔以約9.3億元，沽出觀塘長輝工業大廈等。

不過，今年市場已消化辣招嘅影響，唔少資深投資者今年首季開始出手。

鄧成波銅鑼灣插旗

好似波叔喺年初就連環入市，包括以約6億元掃咗銅鑼灣軒尼詩道482號地下、地庫及1至3樓一批零售樓面，金額約6億元。佢同劉Sir講，睇好銅鑼灣一線街零售大樓面供應少，所以購入上述巨舖。

佢仲話，近年政府連番推出調控樓市，但係息口仲咁低，商用物業仍有投資價值。

鍾楚義地舖呎價貴絕

銅鑼灣零售前景佳，資深投資者鍾楚義或有關人士亦以進取價奪舖，上月以約1.85億元連約購入該區波斯富街77至83號地下N舖，以建築面積約200方呎計，呎價達約92.5萬元，有機會係全球呎價最貴舖位。

唔少投資者買舖冇耐更即獲承接，投資者蔡志忠今年二月以約1.35億元買入嘅銅鑼灣羅素街8號18樓全層將作銀座式商業單位，一日唔夠就以約1.42億元「摸出」，帳面賺約700萬元。

佢認為，內地旅客持續嚟香港消費，支持本地零售業，估計今年舖位租售價升幅會比寫字樓同工廈高，會吸引更多資金流入舖市。

受惠劏舖炒賣有價有市，資深投資者林子峰今年初以約1.48億元買入嘅元朗又新街一籃子舖位，上月改名為又一新城，並分間約149個舖，在約五日內摸晒出去，套現約3.6億元，約兩個月帳面速賺逾2.1億元。

不過，商舖投資者黎永滔話，如果銀行落實加息，料到時商舖做價有約一至兩成跌幅，所以依家要睇定啲先。