歐洲央行行長德拉吉繼上月後再次出口術，話歐元再升就唔排除出手。雖然歐元反應不大，惟上次德拉吉都喺1.39水平作出溫馨提示，令市場相信歐央行底線就係1.39至1.40水平。

既然歐央行出咗聲，亦都有進一步寬鬆風險，歐美兩地央行政策分野愈來愈明顯，歐元要再創新高好難，短線已見頂機會頗高，逢高沽比較着數。

不過，歐元要大跌亦非易事，上周希臘重返國際債市拍賣一批30億歐元五年國債就反應好好，反映市場對歐洲經濟具信心。但要留意，今次希臘債主要買家係一啲對沖基金，可能係好多對沖基金今年因美股損手，又要短線交數，惟有吸納呢類有5%回報國債。

既然低位有資金願意真金白銀買歐元成為支持，而美匯指數繼續79至81.7整固，暫時歐元都係上落市，但建議可於1.3880左右試沽歐元，止蝕位1.40，目標先睇番1.3680，一旦到時市況配合先再諗睇唔睇長線少少。