滬港通半年後開通的消息，逐步被市場消化，大市成交額由上周最勁時過千億，縮到得番六字頭，反映唔少基金經理選擇靠邊站，睇埋今日祖國的首季GDP數據至算。睇番上星期三，總理李克強提到滬港通消息前，恒指在22,843點水平（翌日最高抽上23,224點），經尋日急跌367點，收22,671點，顯示因滬港通消息追貨的，好大可能已經被綁。

亞泥及潤泥發盈喜，反映水泥行業已走出去年上半年的低潮期。（資料圖片）

太陽日誌 2014/4/16

尋日50隻藍籌中得3隻唔使跌，跌得最勁分別係獲利盤作怪的港交所（00388）及招商局國際（00144），分別跌5.2%及5.5%，除非滬港通好似○七年港股直通車撻Q收場，否則就已知的有限資訊，開放港滬兩邊投資者「雙邊投注」，港交所有着數係唔使問阿貴。不過，睇番港交所之前已經累升咗唔少，走得太前，都係果句，等佢返到去130至135元先諗。

回復上落市機會增

唔單止藍籌弱，二三線隊得仲勁，全日得346隻股票向上，見紅的有1,034隻，升跌比例幾乎是一對三，是三月廿七日以來最一面倒。尋日恒指即市低位22,658點，技術上，短線補回上星期三於22,625至22,721點留低的部分上升裂口，但亦係三個半星期以來首次低於10日線（22,731點）收市，今日指數宜升不宜跌，否則確認10日線失守，返落去22,500點樓下再玩泥漿摔角般的上落市，機會將會增加。

今日重頭戲唔係九點半開市，而係半小時後的中國第一季GDP數據。暫時大行預測，是增幅將會由7.7%，進一步滑落至7.3%，低過中央全年7.5%目標。本來數據愈差，人行愈有放水的空間，至少有在上半年將歷史高位的存款準備金率，減番幾個百分點的條件存在。

GDP數據不容有失

不過，近排人行班官輪流出嚟話唔會放水，以免畀市場去槓桿化結束的錯誤訊息，加埋尋日一早，人行公開市場正回購1,720億元人民幣，規模比上周同期的630億人民幣多1.73倍，收水動作持續，結果滬綜指向下，連累埋本地中資股捧場客鳥獸散。估計今日數據最有利股市，係符合預期甚至高於預期，如果出嚟係7.1至7.2%，真係唔知一班對中國股市傾向悲觀的大孖沙會點諗。

亞洲水泥（00743）及華潤水泥（01313）發盈喜，印證了筆者今年水泥股業績「開靚個頭」的預期。事實上，去年上半年水泥股業績啱啱處於低潮，好似亞泥、潤泥及兩隻龍頭股海螺（00914）及中建材（03323），上半年盈利貢獻僅佔全年業績的31%、34%、32%及23%。今年首季水泥價有些少向上，煤價無升，斷估水泥股業績會接近到去年下半年水平，計估值平到極。至於可以炒到去邊，除咗要睇今年保障房外，中央在鐵路及基建投入救經濟的決心有幾大亦係重點。以股論股，兩隻龍頭現價下跌風險應該唔大。