滬港通效應正在淡化，適逢人行加大收水力度，A股回軟，港股亦受壓，恒指失守23,000點關，午後跌幅擴大，收報22,671點，跌367點，大市成交636億元。看來長假前，大家都選擇沽貨離場或唔做唔錯，呢兩日都係少啲短炒，提早放假最實際！

冠捷股價沽壓雖有消化迹象，但其業務前景仍未明朗。（資料圖片）

摩笛再度奏起，今次對象係內房股。大摩報告預計，未來數月內地房地產市場情況（包括平均售價及銷售量）會惡化，並調低多隻內房股目標價。阿莊就認為，首季人仔貶值的影響，包括對壓抑房地產市場泡沫的作用，將於次季逐步浮現。在各房企積極推銷樓盤套現下，毛利率受壓在所難免，即使銷售額得以維持，但盈利亦必然受影響，故大摩對內房股口淡淡，亦非毫無道理。

券商股急速降溫

國泰君安（01788）趁板塊氣氛高漲抽水，券商股猶如被澆了一盆冷水，普遍出現回吐。事實上，「滬港通」仲有成半年先至成行，而構思中兩地投資者可直接透過交易所互聯平台買賣，咁券商扮演咩角色？即使魚缸錢多咗有利整體交投，理論上券商可得益，但已有中資上市券商坦言，料佣金有下調壓力，咁一來一回，到底有幾多得着，真係天曉得！阿莊仍然相信，今鋪阿爺未準備好就爆出「滬港通」，目的似係防風維穩，季內餘下時間魚缸或有大風浪，缸邊友別輕視市場風險。

尋日有盈喜股亦有盈警股，盈喜股有華潤水泥（01313）及亞洲水泥（00743），預計首季盈利顯著增長，惟潤泥股價收市無升跌，亞泥則升3%，整體反映算係溫和。至於盈警股則有冠捷科技（00903），公司繼去年度轉盈為虧後，尋日上晝停牌，午後復牌通告披露盈警，預計今年首季業績將繼續見紅，原因係主要市場的需求持續疲弱、新興市場貨幣兌美元貶值、以及就TP Vision之轉型及重組之一次性支出所致。消息拖累其股價急挫，以全日低位1.31元收市，跌幅9%，但成交唔多，僅291萬元。

老實講，以冠捷現價市帳率才0.2倍，已頗大程度反映經營逆境，從尋日股價下跌成交不多，足見沽壓已消化得七七八八。不過，在投資者心目中，圍繞冠捷仍有一大堆疑問，包括其南美及歐洲市場電視業務是否已轉穩？清理存貨進度如何？今年新產品上架時間表以及增持TP Vision至全資擁有後，具體重組計劃及發展部署如何？看官宜待這些問題明朗化後，始作撈底部署。