上周五港股升勢無以為繼，恒指一度失守23,000點關，收市報23,003點，一周升幅2.2%，「滬港通」與「港股直通車」相比，對魚缸的刺激作用似乎不可同日而語。展望本周，長假將至，不排除交投會轉靜，宜逐步減倉，皆因假後行情好大機會受月底聯儲局議息會議左右，仍不能排除本月期指先高後低的可能性。

蒙牛業務發展備受國策支持，勢成內地資金來港掃貨目標。（資料圖片）

有別於「港股直通車」構思係單向北水南來，今次「滬港通」係相向，畢竟依家內地唔係幾年錢咁水浸，而係水頭趨緊，相向做法唔會招話柄。

引入外資紓緩水緊

至於背後動機，對香港而言，七月前內部有動盪因素，不排除阿爺先顯示有「銀彈」來港坐鎮，叫外資大鱷咪乘機渾水摸魚；對內地，依家地方債問題困擾整個銀行體系，雖然官方多次淡化危機，但大堆數字難以就此抹掉，引港資入A股，變相設立更多渠道引入外資，協助解決危機。

再講，MSCI研究納A股指數入系列指數中，一旦落實唔少指數基金都要落場買貨，此前增加渠道讓外資有序進入A股市場，亦係合理推想。但講到底，現屆中央政府行事審慎，做得咁大動作，背後肯定有周詳盤算，總之多咗錢由香港進出，醒目股民點都有着數！

上周四、五，A、H股差價概念掀炒風，雖然在AH股差價收窄的大趨勢之下，存在套利機會，但在這個過程中，別忘記A、H股價存在聯動性，A股存溢價，可透過A股跌或H股升來收窄差距；同樣，A股存折讓，可透過A股升或H股跌來收窄差距，可見呢個估值接軌遊戲存在一定難度。

反而，內地投資者可透過「滬港通」參與投資港股，他們好想買但在A股市場無法投資到的公司，料將受益不淺。舉個例子，國策支持本土乳企快速發展，蒙牛乳業（02319）有懂管理懂財務的主要股東領導發展，又有海外同業作為主要股東引入必須要的技術，相信三、五年時間，可以成為海內外投資者看好的重點本土乳企。

近月蒙牛股價明顯強於大市，上周五創歷史新高43.8元，向上直望無阻，現價一四年預測市盈率29倍，市值才剛過100億美元，相信呢輛「順風車」仲有排坐，可以逢回吐收集作中長線持有。