日本央行日前議息，都預咗維持利率不變。睇番份聲明，央行行長黑田東彥口多多講話現階段無進一步討論加推量寬的需要。

不過，IMF似乎唔同意呢個睇法，就將日本經濟增長由1.7%下調至1.4%，出年的增長更下調至1%，可能係預期銷售稅無可避免令居民減少消費，令零售業生意難做，難怪日本企業對未來經濟未敢過分樂觀。

雖然唔可以完全賴晒銷售稅，不過有負面衝擊下居民難免減少消費，所以日本繼續擴大QE的機會仍然較高。隨着美國十年債息長遠回升，屆時美國資產的吸引力上升，基金經理肯定有誘因沽日債買美債，令日圓沽壓大增，到時日本政府更加需擴大QE令自己成為日債最大買家。

故黑田東彥佢有佢講，但投資者就唔會盡信，技術上101.20支持仍相當重要，只要守得住呢個位，仍然係買入美元兌日圓的好時機，止蝕於100.70，目標先睇104、甚至今年一月高位105.40。