美國科網及醫藥股近日插水式急挫，前晚終於見反彈，縱觀這批新經濟股，近期股價的確傷，好似準備分拆微博（WEIBO）上市的新浪網（SINA），一月初股價響90美元附近，前晚得番52美元，累積跌幅四成二。科網股估值升得快落得仲快，主觀意見係短期網股有反彈唔奇，但中線可能已見了一個重要高位。諗落依家最心急嘅應該係馬雲，事關如果微博掛牌後唔掂，隨時拖累埋阿里巴巴上市估值。

萬洲收購SFI出價僅約十三倍PE，反映今次上市估值定得頗進取。（資料圖片）

太陽日誌2014/4/10

綜合大行預測雅居樂業績（人民幣）

常言道，口裏說不，手底下卻是最老實。啱啱人行官員放風，強調收水策略會維持，可是下周三中國第一季GDP曝光，九成機會達唔到中央全年的7.5%目標，醜婦終須見家翁，人行到底有多大耐性，能繼續放任不理？

放水預期續升溫

由近兩日港股強勢，在在反映市場自身睇法，預視中國走回頭路，放水刺激經濟的預期在升溫。美股轉弱，意味新興市場撤資回流美股的誘因減低，加上中資股帶動，恒指尋日再下一城，升246點，收報22,843點。走勢上，係擺脫上落市格局，抑或突破雙頂，應該日內會有答案。

外電報道，去年鯨吞美國最大豬肉加工企業史密斯菲爾德（SFI），再由雙匯改名的萬洲國際，其承銷團有多達廿八間投行參與，破埋舊年銀河證券（06881）廿一間承銷行的紀錄，的確係土豪無極限。

顧名思義，萬洲管理層想將公司打造成豬肉食品行業的地上最強，今次以每股8元至11.25元招股，相當於15至20.8倍PE定價。睇番舊年以相當於544億港元總代價，收購SFI包裝再整體上市，以當日收購價僅約13倍PE，反映今日對內地生意的估值定得頗進取。近期內地豬價低迷，合併後公司短期增長前景平穩，下限定價仲可以諗諗，如果中高位定價的話，吸引力恐怕唔大。

雅居樂踩油發力

內房三月銷售數據陸續曝光，華潤置地（01109）銷售額38.3億元（人民幣．下同）；合景泰富（01813）銷售額23.13億元。即使有人質疑派大息挾淡友做法，但恒大（03333）三月盤數確係唔錯，合約銷售額104.3億元，按年升66.4%。

雅居樂（03383）比較有趣，三月銷售額按年大升43%至46.3億元，銷售面積43.9萬平方米，增64%，銷售面積升幅大於套現金額，意味有劈價的情況，三月預售價格按年下跌13%，至10,566元。

分析員解釋，話成都及佛山項目進取地減價29至57%之外，去年銷情遜預期的海南項目見減價促銷，是平均呎價顯著回落的主因。管理層去年多次表示有信心達到全年420億元銷售目標，最後臨門撻Q（403.4億），今年知恥近乎勇第一季踩油發力，首三個月銷售103億元，按年升37%。數據公布後，雅居樂股價抽上7.28港元再撻番落6.99港元收，升得四格。

以犧牲毛利率來達到高銷售目標，似乎唔多值得，但一四年PE低於4倍，堪稱內房平霸，又真係話佢唔落，相信7元左右貪平博反彈風險有限，但如果跟住幾個月銷售策略不變，股價有機會跑輸其他同業。