美股前晚終於回穩，港股昨日在A股持續向好之下繼續挾淡倉，恒指收市報22,843點，升246點，大市成交714億元。有關中央再推穩增長措施的說法，至今依然係只聞樓梯響，可見大戶挾倉唔需要太多理由。

雖面對民企加入競爭，但坐擁龐大資產的三大電訊商，仍具競爭優勢。（資料圖片）

究竟係班大戶狐假虎威，渾水摸魚，抑或預知內地真係醞釀重大利好消息出台？到呢一刻，阿莊仍然未敢貿然下判語，反正下周三內地公布首季GDP數字，自有分曉！

呢期先後有股仔玩「笨豬跳」，每次出現呢啲情況，都唔係好現象。新股方面，今年上半年本來諗住有阿里同屈臣氏兩隻大型新股撐場，點知先後落空。

萬洲估值唔算平

次季大型IPO有萬洲，聽聞將啟動在港招股活動，本月底掛牌，招股價範圍約相等於預測市盈率15至20倍，估值唔算平，特別係近期內地豬價處於低谷，部分地區豬價跌至十五年來新低，養一頭蝕一頭。雖然官方已出招穩定豬價，成效有待觀察。再睇現成同類股雨潤食品（01068）同普甜食品（01699），表現都未見突出，且看承銷商有咩板斧令萬洲取悅投資者。

去年末季以來，三大中資電訊股反覆向下，至上月終於觸底回升，來一次較似樣的反彈。以去年十二月上旬高位，對比三月份的低位計，中電信（00728）、中移（00941）及聯通（00762）分別累跌26.1%、25.6%及27.4%。再以三者尋日收市價計，基本上已反彈跌幅的一半。走勢上，中電信及聯通均出現黃金交叉（10日線升穿50日線），相信反彈未完，而兩者之中，又以聯通上升動力較強。

至於中移，表現相對落後，14日RSI處62，一旦同樣出現金叉（目前10日線及50日線分別處於71.35元及71.8元），反彈目標可定在250日線80元關。

講到內地三大電訊商，近日盛傳有關內地流動套餐即將改變一貫「流量清零」的做法，即係話用戶月底到期剩餘用量不會再被清理為零，代之而起，可能係流量半年包、季度包等等。看來，向民企發出虛擬運營商牌照的做法，確可帶起良性競爭，造福消費者。至於三大電訊商的前景，其實亦毋須過於悲觀，皆因坐擁的龐大資產仍具絕對競爭優勢，從正面角度睇，行業競爭加大，將有助釋放其資產價值。

三大之中，論經營表現，阿莊仍傾向捧場聯通，皆因往績增長稱冠，而相對中移，其建設4G資本開支負擔亦較細。