美股隔晚繼續插水，偏偏港股卻能高開13點，之後在A股復市後走強下反覆向上，恒指收市報22,596點，升219點，主板成交回升至738億元。

恆指期貨走勢

兩地魚缸當美股跌市無到，淡友睇到冒汗，唔排除昨日升市，有部分原因是同淡友平倉盤有關。大市表現陰陽怪氣，唔想一旦做錯邊被挾到冇氣抖，適量減磅係明智之舉。

期指日市收報22,630點，升230點，高水34點。中資股成升市領頭羊，國企指數繼續做好，收報10,321點，升164點。

魚缸有關中央再出招穩經濟的說法愈演愈烈，即使人行官員早前否定降準說法，但股民仍在熱議，皆因想唔通若非有利好政策醞釀出台，點解內銀股表現可以如此強於大市！昨日A股假後逆美股而行，進一步加強投資者對月內北方再傳來好消息的信心。

之不過，呢期中資金融股強勢，是否經已在預先反映利好消息，而在維持貨幣政策不變的基礎上，上大人推出刺激經濟措施的空間尚有多大，這些疑問不容忽視。畢竟現在恒指與重大阻力位23,000點距離不遠，但政策市又無得估，做好做淡都兩難，還是別急於建倉，耐心等候大方向出現。