內地股市復市未受美股跌市影響，滬綜指一度重上2,100點，收市升39點，報2,098點。港股則在中資金融股領漲下收復失地，加上騰訊（00700）入場回購初步穩住股價，恒指收市升219點，報22,596點，主板成交回升至738億元。

聯想完成兩宗大型收購後，配合本身於電腦、手機和平板電腦市場的優勢，未來的協同效益值得憧憬。（資料圖片）

阿莊100萬元投資組合

大市應跌唔跌，究竟大戶在搞咩東東，係咪預示北大人又有新搞作？阿莊唔係春江鴨亦無水晶球，但相信今次市況一旦方向轉趨明朗，將維持一段較長時間，所以呢刻唔使急住去沽或揸，等方向明確後再決定上車亦唔遲！

救市憧憬撐港股

技術上，恒指又再收復250日線，且成交回升，似乎10線升穿50日線的黃金交叉效應正在發揮作用。但美股呢排好似冧山泥咁款，港股呢兩日經已算係偏強，要再向上突圍而出，挑戰23,000點關，必要有重大利好消息作配合。是故如今市場都在揣測，內地首季經濟數據欠佳，加埋年中係市場流動性緊張的季節，阿爺唔敢怠慢，密集出招穩增長確有可能。

中資金融股近日走強，先別論是否有春江鴨所為，但沽壓確係明顯收斂了，係咪連大戶都怕被阿爺「挾倉」，不得而知。睇恒生中國H股金融行業指數走勢，由上月低位計已累升13%，尋日升2.2%，並重上250日線樓上收市，10線抽穿50日線，正體現金叉利好效應，短線回吐守穩14,200點水平，表現可期待，難怪尋日有淡友見勢色唔對先行平倉觀望。

車股續有好表現

前日逆市靠穩的汽車股，尋日繼續有好表現，阿莊提及的長城汽車（02333）成功突破40元關，高位見41.8元，收報41.7元，升6.7%，成交6.34億元。此外，東風（00489）、廣汽（02238）及華晨（01114）同升逾3%。

繼續睇吓大晒士股，好耐冇睇過聯想（00992），吸引阿莊重新注意，主要係見近日其技術走勢改善，二月上旬以來首見10日線重上50日線，尋日收報8.93元，跌0.6%，成交3.77億元。

聯想自公布完兩宗大型收購之後，在市場憂慮其資金壓力之下，股價一直在低位徘徊。但其實，公司在個人電腦、筆記本、平板電腦及手機市場的優勢未變，未來兩年母公司更謀求整體上市，公司進行的兩項收購亦具戰略意義，協同效益可予憧憬。反正呢期興起翻炒傳統大價股，博聯想已消化利淡因素，歷時兩個多月的調整完成，整裝待發，短線目標先回補二月初下跌裂口位，重上10元關，50日線支持在8.5元。

組合持股方面，阿莊仍持有的新環保能源（03989）將會易名為「首創環境控股」，以凸顯作為北京首創旗下環保業務的旗艦角色，會繼續持有。