今個星期美國重要數據唔多，市場比較關注係星期四凌晨聯儲局公開上月底嘅議息會議紀錄，又繼續觀察吓聯儲局官員對息口步伐的睇法。

澳元兌美元走勢

如果加息預期升溫，對比歐洲有通縮風險、日本有進一步量寬的可能性，美元的吸引力就會進一步上升，咁歐元兌美元、美元兌日圓的方向就明顯不過。

歐、日弱勢，但商品貨幣澳、紐、加，除咗加紙基本因素稍差外，澳紐元一個炒減息周期完結，一個炒加息，都係近期比較強勢嘅貨幣。其中澳洲唔再減息後，央行仲好似對經濟前景幾樂觀，市場開始估澳洲央行可能今年尾到出年第一季有機會加息，令澳洲國債孳息率重新上升。

美國債息難急升

相反，美國就業數據好壞參半，但美國十年期國債孳息反而下跌，而近日貿易赤字稍為擴大，加上年初壞天氣就會將第一季GDP拉低，即係炒加息似乎仍係過早，美國債息難以急升。

睇番澳洲同美國國債息差慢慢出現擴闊的現象，有利澳元進一步反彈。投資者宜留意星期四的就業數據，二月份新增職位大升，令市場有驚喜，如果三月份同樣做好，絕對可令澳元進一步挾高，不過0.9450阻力仍相當大，建議0.9250買入，跌穿0.92止蝕，目標睇0.94水平。