美股經上周五調整後，昨日期貨再跌，恒指連跌兩日，全日跌132點，再穿250日平均線。科技股跟隨納指是重災區，焦點無疑落在騰訊（00700）身上，大市成交金額僅得576億元，單是騰訊正股已佔一成，騰訊輪成交亦有20.3億元，在最大成交金額窩輪榜頭14隻佔咗12隻，購沽比例是84：16，大部分散戶都係博反彈。

雖然五一黃金周效應大不如前，但足以作為本地零售股的落鑊藉口。（資料圖片）

太陽日誌2014/4/8

騰訊開市未幾即跌穿500元大關，全日跌穿過3次，頭兩次有不少散戶趁低吸納，尾市則由大戶最後兩分鐘夾硬頂上501.5元收。騰訊就快1拆5眾所周知，「啡底股」意義在於拆細後仍是「紅底股」，所以心理上認為呢個位不能失守。至於散戶，當騰訊200、300元的時候大部分唔敢追入，但當由600元跌到500元的時候反而覺得抵買，主要係習慣咗高位之後形成錯覺；所以大戶砌高股價後，不愁無機會派貨。

騰訊500元炒上落

股票市場無非是大戶與散戶之間的鬥智遊戲，大戶炒高某類股份後等散戶接火棒，然後收集積弱股再伺機派貨，早幾年炒過零售股，舊年狂炒細價股，都是人棄我取、人取我棄。不過，科網股相信未有咁快玩完，大戶亦冇咁快完成散貨工程，仍有不少人看好，鄧普頓「光頭博士」就唱反調話開始買入科技股，史提芬相信騰訊短期仍會在500元附近玩上落。

中資股雖然繼續強勢，但由呢個禮拜四開始逐步公布三月及首季內地經濟數據，是危是機因人及因情況而異，有可能「愈墮落，愈快樂」，因為經濟數據差代表憧憬中央有機會救市，現時市場最憧憬的是降準，但人行仍不斷進行正回購收水，降準似乎有欠邏輯。不過，遇到投資者「反向思維」，出口弱就救出口，樓市弱就鬆綁，只好信投資格言：有智慧不如順勢。

舊經濟股難大贏

雖然市場對經濟數據反應難料，但三月數據相當重要，尤其出口數據受惠於人仔貶值及美國惡劣天氣消退，理應強勢反彈。四月股市傳統偏強，然後到「五窮六絕」。新經濟股選擇很少，當大量資金追逐有限股份，想唔爆升都難。相反，所謂舊經濟股瀚海無邊，要揀都有排揀，且蟹貨壓頂，買得中亦難言大豐收。

睇來睇去，水泥股反而屬穩陣之選，海螺（00914）同潤泥（01313）剛破頂，首季業績相比去年基數低甚有保證；上周推介之中建材（03323）今年負債比率有望降到兩倍幾，估值由5倍升到6倍，已代表兩成升幅。

想敲冷門的話，可選本地零售股，雖然五一黃金周效應大不如前，但總算有藉口落鑊；金飾股六福（00590）預測PE唔夠10倍，未來大有機會為三月底止的年度業績發盈喜；而莎莎（00178）就快請「都教授」來港宣傳，9蚊調整到6蚊，可謂衰極有個譜。本地零售股今年表現較差的其中一個原因，是兩會期間有人建議收緊「一簽多行」，但這牽涉到龐大利益，無論放寬或收緊均會面對極大阻力。