雖然尋日港股跌幅僅半個百分點多啲，但幾個先前熱炒的板塊都血流成河。騰訊（00700）一如所料考驗500大關。此刻冇貨在手，落到嚟呢啲大位想博大霧短炒一轉，炒家投機心態唔難理解。只是，觀其14日RSI處35，尚未算極度超賣，阿莊都係抱唔做唔錯心態對待。至於高位接貨而未及逃生者，宜認真檢討持貨能力，妥善控制持倉風險，謹記留得青山在，保本最重要！

內地汽車股中，長汽在SUV車款方面的發展成績有目共睹。（資料圖片）

事實上，睇見近期強勢股轉弱勢的情況相當普遍，就如復星醫藥（02196），眨眼股價已由上月高位30.96元掟到落尋日低位僅24.6元，唔使一個月累跌兩成；石藥集團（01093）亦由上月高位8.49元回落至尋日低位6.18元，累跌27%。此外，華能新能源（00958）亦由上月高位3.72元回落至尋日低位2.39元，累跌36%。

提防大戶續減倉

如此現象，究竟係基金沽貨離場，抑或調動組合，將資金由超買板塊轉攻弱勢板塊，以部署次季甚而餘下三季的倉位？阿莊想起年初有高人話，馬年全球動盪，叫大家要注意安全，規避風險，所以呢期都係抱審慎態度，上月已着手減持倉位，畢竟賺錢唔使賺到最後一分錢才滿足，既然預視風雨將至，宜及早做好防風措施。作最壞打算，四、五月大戶會繼續減倉，六月世界盃市況將明顯轉靜，指數在低位盤整，等第三季尾或末季始知有沒有轉機。

幸好尋日亦有中資板塊逆市靠穩，除內銀股外，汽車股表現亦唔差。東風（00489）、廣汽（02238）、及長城汽車（02333）逆市升0.3至1.5%，華晨（01114）及吉利汽車（00175），更分別錄得4%及3%升幅。

首季汽車股表現不濟，以長汽為例，首季股價延續去年末季的跌勢，曾低見31.25元，較去年末季低位累跌近四成，「長城飛車」的美喻好快被淡忘了。不過，首季其股價基本上守住了長期升軌支持31元水平，上月中旬開始展開反彈浪，近兩周一直企穩在250日線38.4元樓上，尋日收報39.05元。

到底長汽股價是否已完成調整，大戶再重建好倉，尚須觀察。不過，在汽車股之中，長汽亦是實力之選，過去在SUV車款方面的發展成績有目共睹。據講，本月長汽開始銷售H8，而六、七月會推出H2。同地產股賣樓一樣，推銷新貨期間股價一般會靠穩或向好，故亦不妨留意其股價表現。走勢上，若然短線能成功突破40元關，下一個重要阻力在45元水平；但若然在40元關受阻回落，則可待回試50日線36元水平承接，再作考慮。