上星期，投資者都聚焦美國勞工部公布的三月份就業數據，結果失業率為6.7%，差過市場預期的6.6%，而非農業職位增長19.2萬份，其實只係比預期的20萬少區區八千份，至於二月份經修訂後的數字更達19.7萬，反映美國就業市場情況理想。

消息指港股直通車政策已上報中央，刺激港交所股價做好。（資料圖片）

太陽日誌 2014/4/7

數據唔錯，只不過無樂觀的投資者預期咁強，消息公布後，十年期美債息回落，標普五百指數創新高後回軟。

網絡股暫宜迴避

值得留意的是，今浪支持美股升浪的中堅份子，網絡股及生物科技股有明顯回吐，由生物科技股組成的納市ishares（IBB），周五晚急挫4%，facebook與一眾美國上市內地網股跌幅亦唔細，反映華爾街投資者口味似乎正在轉變，年初香港魚缸炒得火熱醫藥及網絡股，在普遍估值偏高下，短期最好都係避一避。

上星期港股累積升444點，收報22,510點。港交所（00388）走勢標青，嚴格上只用了唔到三個交易日（周三午後曾經停牌），就累積9.2%升幅，周五收報130.5元，是今年收市新高。

內地傳媒消息指，最終版本的港股直通車政策已經上報中央，正等待審批，未來港交所將與上交所及深交所互聯互通，九成股份可相互買賣，首批額度更達500億美元。從上述內容所見，不折不扣就是○七年香港魚缸表錯情的港股直通車加強版，只係今次股市學精了，無第一時間去炒AH股折讓收窄，而係首先捧既得利益者港交所場，尤其在澄清未有進展下，港交所股價在周四、五依然搶高，可見深信事件最終會水到渠成的大有人在。

純陰謀論猜想，一七年香港普選採用何種方式，今年會是決定性的一年，中央揀今年放行直通車，為股市及經濟營造樂觀氣氛的政治誘因唔細。當然，港交所股價在去年十一月開始拾級向下，累積跌幅大，近期港股成交持續維持於600至700億，唔算太奀，如果短線回吐落返去125元樓下，可以諗諗。

雙馬染指中石化?

上星期曾經傳中石化（00386）向高盛出售三成零售業務資產，作價300億美元（相當於2,340億港元），消息迅即被中石化否認。其實，自從中石化宣布容許業務引進私企資金，上限三成的計劃曝光後，類似傳聞幾乎日日新鮮，筆者唔懷疑高盛財力，但橫睇掂睇，市場上最想吞併這個涉及全國零售及配送網絡生意、又隨時可以開出天價的，應該唔會係計過度過，點都無死錯人的投資銀行，反而係雙馬的阿里巴巴及騰訊（00700）。

新世界（00017）供股權今日登場，點解要以較資產值大幅折讓的作價供股，去私有化高於1倍市帳率、絕對唔便宜的新世界中國（00917），相信世界上只有少數人知道真正謎底。賓架界對最終完成私有化的機會，並非十分看好。但姑勿論點，供股點都會做，而近期本地地產股已經吸引到價值投資者留意，開始有跑贏大市的本錢，而當中最最最低殘的新世界，小股東們無論如何都唔應該放棄供股。往績顯示，此系過往企埋大股東同一陣線的，往往都會係最終贏家。