近排市建局都幾積極推地，土瓜灣馬頭角區新山道，同埋觀塘市中心第二及第三發展區，會喺今日同聽日截標同截收意向。劉Sir覺得焦點會落喺計劃打造成「小太古城」嘅觀塘市中心重建項目上，呢個係市建局歷來最大型嘅項目，總投資額達170億元。有測量師老友覺得每方呎樓面地價約莫6,500元，相信大部分發展商都會申請「入場券」，長實（00001）同新地（00016）早排已經話對項目有興趣。

觀塘市中心重建計劃第二及第三發展區，預計可於二○一九年落成。（模擬圖片）

高緯張翹楚估計，不少財團都會遞交觀塘市中心重建計劃意向書。（資料圖片）

市建局兩項目基本資料

聽日截收發展意向嘅觀塘市中心重建計劃第二及第三發展區。

涉千七伙 市建首補貼

劉Sir知道，項目佔地約莫23.4萬方呎，將會提供4幢分層住宅，加埋大約1,700個單位，而項目地面會設有4層高嘅大型平台，作為公共交通交匯處同埋商舖等用途，而市建局今次仲破天荒咁撥款18億元，補貼發展商作為呢個大型平台嘅建造費。

高緯環球張翹楚就話，呢個觀塘市中心重建計劃都幾吸引，估計大部分財團都會遞交意向書，睇下詳細發展條款。

新山道今搶先截標

不過張翹楚覺得，中小型財團要獨資入標會比較困難，所以競投財團相信都會係大型發展商或者合組財團為主，佢仲話，參考番東九龍最近批出嘅住宅及商業用地，呢個觀塘項目樓面呎價約6,500元係合理水平。

至於今個年度市建局「第一擊」嘅土瓜灣新山道/炮仗街商住項目，就將搶先今日截標。論規模當然比唔上觀塘重建項目，新山道總樓面約莫11.3萬方呎，其中約1.89萬方呎係商業樓面，提供大約144個單位。劉Sir知道，項目早前一共收到23份意向書，但係市建局最後只邀請其中19家入標，包括長實、新地、英皇國際（00163）同埋萬科置業（香港）等多類型發展商。

項目將來賣樓收益如超過13.3億元，即係平均呎價約11,729元，中標財團就要向市建局按比例分紅，但以呢個呎價水平嚟換算番實用呎價，仲高過區內二手價，所以劉Sir覺得發展商未必需要分紅。