港股連升五日，在外圍股市帶動下，恒指昨日收報22,565點，升41點，主板成交716億元。沽空佔大市比例升至10.65%，為九個交易日以來最高，反映淡友在大市作勢挑戰二月底22,986點前夕，積極性加強。

恆指期貨走勢2014/4/3

昨日五十隻藍籌七成做好，點數升幅唔多，只拜騰訊（00700）一隻逆市向下，拖低指數52點，限制大市升幅。即月期指日市收22,554點，低水11點，成交4.89萬張。

昨日期指早市以22,551點開出，現貨開市一刻，見全日高位22,750點後，好友再攻的意欲減低。期指由一點十五分至四點十五分，僅在22,526至22,588點的62點波幅內上落，好淡雙方無主動出擊的決心。

大市由谷底21,137點累積反彈點數唔細，一連兩日出現陰燭收場，多少同日線圖恒指緊貼保力加通道頂有關。展望今晚美國公布三月就業數據，目前街外預測相當樂觀，非農職位估計增加20萬，是近一季新高。

至於賭大定賭細？主觀睇法係數據低過預期，可能打擊近日支持股市強勢的經濟復甦故事，勝預期的話，美股未必會跌，但聯儲局退市理由更充分，對新興市場未必着數，權衡輕重後，今晚持好倉過夜值博率唔高。