港股連升五日，恒指昨日再升41點，收報22,565點，回到近四個星期高位，惟總成交較上日少20億至716億元，沽空佔大市成交亦都升上10.6%的九日高位，似乎睇淡大戶在見到大市由低位反彈千四點後，開始蠢蠢欲動。

中央推動鐵路投資及加快保障房發展，水泥股有條件睇高一線。﹙資料圖片﹚

太陽日誌2014/4/4

大行預測中建材業績﹙人民幣﹚

技術上，港股自三月初高位22,986點插到落最低21,137點，上月底因新興市場走資潮收斂，加埋聯儲局官重申非常規貨幣政策對支持美國就業復甦的作用，港股V型反彈，去到昨日高位22,722點計，收復三月初跌幅八成五，短期突破22,986點的話，近四個月一浪低於一浪的劣勢可望扭轉。

股仔炒風未停

不過萬一今晚美國就業數據太好，又再掀起市場對美國退市步伐加快的預期，指數隨時撻番落22,000至22,300點附近。尋日騰訊（00700）再度跌穿550元，但並無影響二三線股氣氛，全日共有28隻股仔升幅超過一成，相反跌幅多於一成的股仔得6隻，指數愈來愈反映唔到大市氣氛。

李克強的中央經濟報告，訂全年GDP增長目標7.5%，中國首季GDP今個月十六號登場，街外預測會由去年同期的7.7%放緩至7.3%，要達到全年目標，於第二季鬆綁放水是合理期望，但啱啱人行透過《金融時報》刊登評論文章，暗示現階段降存款準備金率刺激經濟，會畀市場錯誤訊息，影響去槓桿化的計劃。

既然放水期望短期幻滅，市場推測中央仲有乜板斧令GDP達標，睇來睇去，都係行番○九年基建救經濟舊路的呼聲最高。李克強主持國務院常務會議，確定深化鐵路投融資體制改革，支持鐵路股做好，中鐵建（01186）及中鐵（00390）分別升7.2%及5%，收報7.43元及3.92元。

鐵路投資急增

尋日，滙證以新鐵路項目增長高於預期，估計真正放緩期要到「十三．五」至出現為由，出報告建議增持中鐵建，目標價由7.4元調高到8.4元。瑞銀報告就估中鐵建今年新合約將由去年的2,160億至2,170億人民幣，躍升到3,000億至4,000億元人民幣，目標價睇10.5元，中鐵睇4.9元，同樣評為買入。

長遠中國逐步實現城鎮化，短期推動鐵路投資及加快保障房發展，可唔可以吸收到鋼鐵業嚴重過剩的產能，仲係未知之數，但舊年因為老舊產能逐漸被中央勒令淘汰，加上煤價下跌之助，業績本已不俗的水泥業，實在無理由唔睇高一線，春節後需求回升，加上水泥庫存回落，近期水泥價格已開始穩步上揚，尋日西泥（02233）、聯合水泥（01312）、山水水泥（00691）都升得多，但穩陣之選無理由唔揀番龍頭海螺（00914）、潤泥（01313）及中建材（03323），三隻近排都升得唔少，或者捧場客可以等短線回吐至入貨。三選一的話，筆者會揀營運槓桿最高、估值最低的中建材。