外圍送上東風，港股繼續矮仔上樓梯，恒指一度高見22,722點，收報22,565點，升41點，大市成交716億元。阿莊維持恒指升近23,000點將現重大阻力的睇法，但既然大戶有心挾淡倉，好漢不吃眼前虧，暫避重磅股，繼續小注跟炒異動板塊，且盡量不持倉過夜，事關經驗相告，呢啲市可以眨眼就轉邊。

潤電業務覆蓋火電及風電，可受惠煤價下降及內地電力需求增長。（資料圖片）

恒指呢轉升市，先係中資金融股，再到科網、醫藥、兩地地產股輪流接力，尋日就連水泥、鐵路股都要動身接棒。事緣國務院總理主持常務會議時，確定要深化鐵投融資體制改革，加快鐵路建設政策措施，又指要發揮開發性金融對欄戶區改造的支持作用。回想前總理救市，也是從催谷鐵路基建着手，正所謂「橋唔怕舊，最緊要受」。

中央出招穩增長

講到內地經濟，本周官方公布三月份中國製造業PMI為50.3，終於結束連續三個月的跌勢，但同日中國三月滙豐製造業PMI終值卻創八個月新低，為48。究竟為何有如此大的偏差，大概有多年投資中國市場經驗的投資者心裏有數，而對於近日官方開始出口術挺經濟，亦應該不感意外。阿莊相信，首季內地GDP增幅頗大機會低於年度目標7.5%，次季有望回穩，但會否一如投行所言，人行會下調存款準備金率甚至減息，相信有待本月數據公布後始能定奪。

中央開始穩增長的迹象愈趨明顯，電力需求向來與經濟冷熱有較直接關係，中資電力股值得關注。華潤電力（00836）股價自去年中開始，一直維持在17至21元水平上落，尋日高位見20.8元，收報20.6元，升幅2.7%，眨吓眼又已重返上落區頂部，亦係自去年十月以來首次10日線先後重上50日及250日線，若短線回吐守穩250日線19.4元，有條件嘗試向上突破。

分析電力股，除咗睇發電量同電力需求外，同樣重要的是發電成本。展望今年煤價不但未有回升條件，更可能會再進一步下調，這個大環境對電力股有利。去年度潤電的業績符預期，展望今年盈利有望維持雙位數字增長，一四年度預測市盈率8.5倍，息率逾3厘，攻守兼備，年內股價有條件上試22至23元阻力區，不妨分注作中線收集。