近排零售市道吹淡風，759阿信屋就睇準舖位業主求租心切，啱啱租咗尖沙咀柯士甸道一個面積達約2,000方呎嘅地舖，月租約18萬元，比起舊租高咗一倍。不過，阿信屋母公司CEC國際（00759）主席林偉駿就話，個舖位於傳統旅遊區，市況旺嗰陣，個舖月租近30萬元都大把人搶住租，所以今次係值得租嘅。

阿信屋母公司CEC國際主席林偉駿指出，剛承租的柯士甸道地舖，人流量高，租金合理。（資料圖片）

近期九龍區地舖租售個案

林偉駿同劉Sir講，啱啱租嘅柯士甸道114至116號地舖，好近彌敦道大街，人流量高，旺市時月租閒閒哋近30萬元，依家以每月約18萬元就租到，呎租大約90元，租金十分合理。

化妝品好賣 擬開20店

個新舖會打造成該公司旗下專賣化妝品嘅Kawaiiland，佢仲話，由於化妝品生意利潤好過賣零食，今年計劃為Kawaiiland開設約20間分店，比起原先計劃開4、5間為多。中原黃泳珊話，上址原本由散貨場每月約9萬元租用，依家新租金升1倍。

一向為不夜天嘅旺角，唔少靚舖唔憂租，業主寧願短暫吉住先。代理話，由文記果汁食品租用超過十年嘅先達廣場地下G2及G3號單邊地舖，月租料近30萬元，租期上個月屆滿，尋日已經搬出，估計依家市值月租差唔多要40萬元，以面積約234方呎計，呎租超過1,700元，圍起上嚟每日租金超過1.3萬元。

尋日劉Sir見到上址貼上遷舖啟事，文記本月中喺同街G23及25號舖重新營業。聽講新址面積約350方呎，月租約18.8萬元，新舖大啲，租金平咗。

旺角樓上舖租金波動

相比之下，同區上樓舖租金波動好多，銀城廣場1樓近排連錄6宗舖位租賃成交，其中有個舖新租金每月5,000元，比之前減19%。不過，同層另一舖位新租金每月9,000元，比之前高咗29%。

由於旺角一線街舖租金有保證，聽講太子珠寶鐘錶主席鄧鉅明或有關人士剛買咗西洋菜南街28號地舖，涉資約2.2億元，呎價約55萬元，呎價係九龍地舖呎價新高指標。據聞佢都放緊黃竹坑環匯廣場兩層特色商廈單位，涉資近3億元。另據悉銅鑼灣銅鑼廣場劏舖The Three計劃改全層賣。