美匯指數由跌轉升，一方面是由於升勢最強的澳元同紐元，都唔屬於美匯指數的成分貨幣，另一方面是因歐元明顯由1.40關口轉跌，只是美匯指數一日喺79至81.60整固，都唔可以話美金行單邊升市。

美元兑日圓走勢

今日開始，日本消費稅就正式由5%上調至8%，各大百貨公司已經大舉促銷，務求吸引民眾趕在加稅前掃貨。

市場有唔少質疑安倍晉三的第三支箭射錯隔籬，要求進一步量寬的聲音愈來愈大。不過筆者對四月立即加推量寬有保留，一方面經濟其實慢慢好轉，失業率跌至六年新低而通脹亦明顯回升，照計唔需要咁急加推量寬。再講，等到六月、至少有兩個月數據觀察加稅對經濟的負面衝擊，對推量寬的銀碼亦可拿捏得較準確。

技術上，由二月開始到依家，美元兌日圓只係喺100.70至103.70窄幅上落，由年初至今都只有唔夠500點的波幅，不過短線已分別喺100.70、101.20同101.90出現支持，其中101.20先後3次測試，此位相當重要，一旦跌穿幾可肯定有大量止蝕盤出現。

今個星期美國亦有非農數據，只要美國就業市場繼續好轉，就可以將之前不穩數據全賴「天氣的錯」而繼續退市，央行政策分野愈來愈大，始終有利美元兌日圓進一步向上，阻力分別於103.40，下一阻力將在今年高位105.40。