基金季結日，港股市況意外地平淡，雖然繼續見熱錢由醫藥、網絡股回流內銀、內險股，但已再無出現上星期二、四，二三線股像黑色暴雨一樣的狂瀉局面。恒指昨日埋單升85點，收報22,151點，主板成交660億元是八日以來最低，恒指累積整季計跌1,155點或4.9%，國指跌6.8%，比滬綜指同期3.9%跌幅大。

人行次季下調存款準備金率的機會不低，有利內銀股維持強勢。(資料圖片)

太陽日誌

睇五十隻藍籌，首季有十一隻逆市錄得升幅，包括有重組及分拆概念的中信泰富（00267）以及利豐（00494）、去年業績好而估值仍低的華潤電力（00836）、放寬民資合作比重上限的中石化（00386）、分拆業務上市的電能（00006）、股王騰訊（00700）、去年業績勝預期的旺旺（00151）等。

但最意想不到的，仲係退市陰霾下四隻本地地產以及收租股，包括長實（00001）、信置（00083）、恒地（00012）以及太古A（00019），跌市中都有0.1至7.5%進帳。

非長期投資對象

三月初市況急轉，唔少本地對沖基金埋數都發現得個做字，尤其科網及濠賭股升勢逆轉，帳面富貴都無埋，反而連牛頭角順嫂都識得under weight的內銀股，統統都跑晒上嚟，如果short落隻建行（00939），睇見佢季結之前居然連升七日，都咪話唔頭痕。

近日四大行業績，最後條大數，清一色都比分析員預期好，就算股價彈咗成個星期，中（03988）農（01288）工（01398）建，PE講緊4.9、5.3、5.1及5倍，連藍籌股平均市盈率一半都無，本來無乜可以挑剔，惟獨人人都知利率市場化，息差壓力今年會持續。

反之，不良貸款仲處於上升周期，芬佬對國有企業偏低貸款壞帳，加上極大的風險溢價在內。筆者相信內銀係炒趨勢而唔係十分理想的長期投資對象，不過依家通街估李克強總理要保住7.5%，第二季存款準備金率下調的機會好大，buy on rumor sell on fact，或者中線內銀股回勇之勢，可能會捱到人行落實放水都未定。

恒大高息殺淡友

恒大（03333）收市公布業績，核心業務盈利按年升66.3%至103.1億元（人民幣．下同），毛利率按年擴大1.6個百分點至29.5%。去年恒大如期打入內房企業的千億俱樂部，全年合約銷售升8.8%至1,004億元，一四年新訂目標1,100億元，意味有9.5%增長。

筆者唔知恒大掌舵人百足咁多爪，又搞球隊又發展礦泉水生意，同基金成日將恒大視為沽空對象有無關係，但恒大主席許家印同對沖基金經理唔多啱傾，已經唔係新聞，過去增持及回購趕淡友的事迹，相信有番咁上下歷練的缸邊客，無不耳熟能詳。

特別留意恒大成績表，因為早兩日已聽聞，恒大績前街外有做借貨生意的投行，老早畀大孖沙借到爆晒（尋日沽空唔大，得372萬股，佔成交4.5%）。

昨業績亮點，查實唔係賣幾多樓或者目標幾多，而係恒大主理人突然決定派大息，末期息0.43元人仔，比前年的0.14元人仔多出2倍，以尋日收市價3.66港元計，即2.89元人仔，股息率足足15厘！今舖真係唔挾爆街外淡友都幾難，就算好少參與呢類基金與大股東的鬥法，單係做花生友當睇戲，都夠晒過癮。