近兩日，開市期間收到唔少老友的WhatsApp，都係問「知唔知隻XXX做乜隊成咁？」之類的短訊，一場二三四五線股的白色恐怖，意想不到在三月基金季結前夕出現，尤其見騰訊（00700）在阿里巴巴拍板去美國上市後都見腳仔軟情況，炒到出煙的雙馬概念股自然高處不勝寒，連手遊、網上支付、新能源及醫藥股，都有全面食胡手影，與其搵原因問點解跌，不如話芬佬們都係不問藉口，總之洗之而後快。

隨着新廠房投入營運及新品牌效應，廣汽盈利能力將有所提升。(資料圖片)

太陽日誌

以騰訊撻落521.5元，已拖低指數112點計，尋日個市跌53點收場，實際十分溫和，但睇成個市上升與下跌股份，分別係371及1,115隻，升跌比例1︰3，較星期二細價股災當日的1:2.58，有過之而無不及，記得當日五十大跌幅，跌8.5%夠上榜，尋日要跌11.1%至排到榜尾，二三線隊得幾勁，大致可體會得到。

資金乾坤大挪移

近排基金施展乾坤大挪移，沽獲利股買積弱股，內銀內險火燒冷灶，留意到環保股腳軟的同時，疲弱已久兼「破壞環境」的汽車股突然有番生氣，廣汽（02238）出業績，去年盈利26.53億元（人民幣．下同），升1.33倍，雖較分析員預測介乎23.8至33億元的中位數28.39億元稍低，但可能因為股價自去年十一月高位10.94港元以來已累跌兩成七，故昨日未有太大反應，反而仲有一格進帳。

今年銷售目標進取

去年廣汽的乘用車產、銷數目，分別升46.6%及44.2%，遠高於全國平均的16.5%及15.7%，可見其品牌及車款頗受用家歡迎，公司目標今年整體銷售有25%增長，比分析員估算的17至20%進取得多，隨着今、明兩年新廠房投入營運及新品牌效應，盈利高增長點出現，今年可賺42.5億元，一四年PE9.6倍。

針對中央鼓勵節能減排，尋日廣汽高管提出今、明兩年會投放更多在新能源汽車，並正與政府商討加快建設新能源相關的自有設施，包括充電站等，組成聯盟推出新能源汽車。

既然以一四年57倍PE買比亞迪股份（01211），都係憧憬對業績幫助十畫未有一撇的新能源汽車，想從實際收益與概念之間取得平衡，筆者會比較buy廣汽。