銅鑼灣一向都係內地旅客「血拼」嘅集中地,區內核心地段嘅舖租增值潛力真係幾驚人。好似劉Sir老友資深投資者黎永滔(滔哥),佢喺銅鑼灣羅素街嘅舖位,由連鎖鐘錶珠寶店租緊,租約差唔多到期,佢打算加租約36.4%至月租300萬元,仲話好有機會獲現有租客續租。如果落實,計番呎租近4,300元,勢成本港「新舖王」。

資深投資者黎永滔持有的銅鑼灣羅素街舖位,打算加租約三成六。

全港舖位最高呎租排名

呢個羅素街59至61號與利園山道29至30號地舖,租客係連鎖鐘錶珠寶店,月租220萬元,滔哥話租約嚟緊今年十月到期,依家以每月300萬元放租,加幅約36.4%,佢話租客都想續租,有機會喺上半年落實。

呢個舖位面積約700方呎,以新租金300萬元計算,呎租近4,300元,好有機會創全港舖位呎租新高,比起依家同區由找換店租緊嘅景隆街2號,呎租約3,600元現有紀錄,仲足足高出咗接近兩成。

倘加息 舖價恐跌兩成

黎永滔對舖租仲幾有信心,話如果政府無限制內地個人遊措施嘅話,舖租就唔會跌,但對舖位價格就睇淡少少,覺得喺唔加息前提下會有5至10%跌幅,一旦加息隨時跌一至兩成,所以對於近排有投資者適量沽貨,佢就話係明智之舉。

麗港城商場或全幢賣

業界都睇好一線舖位前景,英皇國際(00163)張炳強話,頂級一線舖租保持平穩,甚至有幾個百分點升幅,相反好似銅鑼灣謝斐道呢啲二線地段,最近租金調整咗兩成,估計嚟緊仲有約10至15%跌幅。

舖位租金穩健,商場價值自然升得快,里昂證券亞太恆富資本趙朗同劉Sir講,佢哋嘅藍田麗港城商場以約21至22億元意向價放盤,傾向全幢賣。呢個商場兩年前買入價約15億元,如果成功轉手,短短兩年賺6至7億元。

另一方面,中原(工商舖)潘志明就指出,工商舖受辣招影響較細,集團伺機擴充,最近就以月租35萬元,租咗尖沙咀中心中層大約1萬方呎樓面,連同剛租用嘅同區東海中心低層樓面,總部最新樓面共約1.6萬方呎,比之前大咗約5,000呎,預料全年營業額目標按年增加五成至7.8億元。