內地滬綜指高收，港股則在21,700至21,800點水平整固，指數看似唔多跌得落，但二、三線股卻如刮起大風大浪，特別係季內已累積一定升幅的科網、彩票、環保及新能源板塊，到咗季尾已雄風不再。缸邊友若然已在高位獲利，當然飲得杯落，但若然唔好彩高追咗又未及落車，宜睇位適量減磅套現，小心駛得萬年船！

當跌市來臨，已跌到超賣水平的中移，有望重獲資金注視。（資料圖片）

旭光（00067）又遭沽空機構狙擊，尋日上晝公司中途停牌，停牌前跌7.4%，報1.25元。翻查資料，截至本周一的五個交易日，旭光的沽空比率介乎15至25%，涉及股數合共約3,130萬股，比對截至上周一的五個交易日沽空比率僅介乎0.03至7.3%，涉及沽空股數合共僅179萬股。出現壞消息前沽空活動明顯轉趨活躍，係咪巧合，就由看官自行判斷，會否又有更多民企股成沽空機構焦點，局外人冇得估，只有盡量迴避。

經營環境仍嚴峻

講番藍籌股，昔日大小戶鍾愛的中移（00941），股價由去年十二月高位85.5元，反覆回落至上周低位僅63.65元，累跌幅度足有25%，市值累計蒸發4,500多億元，長情小股東都咪話唔心傷，收息都唔夠買膠布！

事實上，今年中移的經營環境仍面臨嚴峻挑戰，當中包括建設4G的龐大資本開支、同業間為搶4G客在資費上的激烈競爭，持續對ARPU造成壓力、來自民企的競爭（發虛擬網絡牌照）等等。

可以咁講，當大市不乏個股炒作之時，被冷落在旁的中移，估值可以低處未算低，事關其價位大但波幅細，盈利增長前景不吸引；反之，等到大跌市來臨，估值低迷的中移，跌到一定的超賣水平，憑着「爛船都有三斤釘」，經營業務現金流穩定而可觀等因素，才有望重獲資金注視，入場抄底，以部署反彈浪來臨。

以中移現價一四年預測市盈率11倍，估值未算係超抵買。沾手呢類基本因素偏弱的大價股，與其老是「談戀愛」，不如待極端情況出現才入市炒波幅。技術上，近期反彈能重上70元關的機會不大，一旦完成反彈浪並掉頭回落，確認失守63元關的話，可待下試57至60元水平承接始考慮分注收集。

總而言之，預計中移今年股價主要波幅介乎60至70元（相等於一四年預測市盈率10.9至12.7倍），距離此波幅上下限約5至10%，可部署高沽低揸。